فلسطین اسرائیل تنازع

جنوبی غزہ سے زیادہ تر زمینی فوج کو واپس بلا لیا ہے : اسرائیلی فوجی ترجمان

پہلی اشاعت: آخری اپ ڈیٹ:
مطالعہ موڈ چلائیں
100% Font Size
3 منٹس read

اسرائیلی فوجی ترجمان نے اتوار کے روز اعلان کیا ہے کہ جنوبی غزہ کے علاقے میں تعینات اسرائیل کی زمینی فوج کی بہت بڑی تعداد کو واپس بلا لیا گیا ہے۔ ترجمان کے مطابق جنوبی غزہ میں اب صرف ایک پل پر فوج تعینات رکھی گئی ہے۔ یہ اعلان غزہ میں اسرائیلی جنگ کے ساتویں ماہ کے پہلے روز سامنے آیا ہے۔

اسرائیلی ترجمان کے اس بیان کے علاوہ فوج نے اس اقدام سے متعلق ابھی کوئی مزید تفصیل جاری نہیں کی ہے۔ نہ ہی یہ واضح ہو سکا ہے کہ زمینی فوج کے اس انخلاء کے بعد رفح پر اسرائیلی حملے کی تیاری کی کیا صورت ہوگی۔ کیا اس کے نتیجے میں رفح پر حملہ مؤخر کر دیا گیا ہے یا فوج کو رفح کی طرف آگے بڑھنے کاحکم دیا گیا ہے۔ خیال رہے جنوبی غزہ کے جس پل پر اسرائیلی فوج کو ابھی باقی رکھا گیا ہے ، اس کے بارے میں اطلاع ہے کہ یہاں ہزاروں کی تعداد میں اسرائیلی فوجی موجود ہیں۔

خیال رہے اسرائیل اور اس کی قیادت رفح پر حملے کے لیے مسلسل اپنے ارادوں کا اظہار کرتی رہی ہے اور اس کے لیے اس نے اپنا جنگی منصوبہ حالیہ دنوں میں امریکہ کے ساتھ بھی شیئر کیا ہے۔ اسرائیل رفح میں فوجی حملے کو حماس کے مکمل خاتمے اور اپنی فتح کے لیے انتہائی اہم قرار دیتا ہے۔ رفح میں اس وقت 15 لاکھ کے قریب غزہ کے بےگھر فلسطینی پناہ لیے ہوئے ہیں۔

اسرائیلی فوجی ترجمان نے غزہ سے فوجی انخلاء کا یہ اعلان ایسے موقع پر کیا ہے جب قاہرہ میں جنگ بندی کے سلسلے میں مذاکرات کا ایک نیا دور شروع ہونے جا رہا ہے ۔ امریکہ نے ان مذاکرات کے لیے اسرائیل کو کہہ رکھا ہے کہ وہ اپنے نمائندے کو بااختیار بنا کر بھیجے۔ جبکہ مصر اور قطر کو صدر جوبائیڈن نے خط میں ہدایت کی ہے کہ وہ حماس پر دباؤ بڑھائیں۔ تاہم حماس نے ایک بار پھر اس اعلان کا اعادہ کیا ہے کہ وہ قاہرہ مذاکرات کے دوران بھی اپنے مطالبات سے پیچھے نہیں ہٹے گا۔

حماس کے ان مطالبات میں شامل ہے کہ 'اسرائیلی فوج کا جامع انخلاء کیا جائے، مکمل جنگ بندی کی جائے، غزہ سے بےگھر کر کے نقل مکانی پر مجبور کیے گئے لاکھوں فلسطئینیوں کو واپس ان کے گھروں اور علاقوں میں جانے کی اجازت دی جائے، غزہ میں بلا تعطل اور جنگ زدہ فلسطینیوں کی ضروریات کے مطابق امداد کی فراہمی ممکن بنائی جائے۔ نیز اسرائیلی یرغمالیوں کی رہائی کے بدلے میں فلسطینی قیدیوں کی رہائی کی جائے۔'

مقبول خبریں اہم خبریں

مقبول خبریں