عمران، ریحام نے باہمی رضامندی سے طلاق کا فیصلہ کر لیا

پاکستان تحریک انصاف (پی ٹی آئی) کے سربراہ عمران خان نے اپنی اہلیہ ریحام خان کو طلاق دے دی ہے۔ عمران خان اور ریحام خان کی شادی اسی سال 8 جنوری کو ہوئی تھی۔

پی ٹی آئی کے ترجمان نعیم الحق نے ٹویٹر پر جمعہ کو ایک بیان میں کہا ہے کہ عمران خان نے ریحام خان کو طلاق دینے کا فیصلہ ایک نہایت حساس اور سنجیدہ معاملے پر کیا ہے اور دونوں نے باہمی رضامندی سے علاحدگی کا فیصلہ کیا ہے۔ میڈیا پر خبر نشر ہونے کے بعد ریحام خان نے بھی ایک ٹویٹر پیغام میں عمران خان سے علاحدگی کی خبر کی تصدیق کرتے ہوئے کہا کہ 'ہم نے علاحدگی کے لئے کیس فائل کرنے کا فیصلہ کیا ہے۔'

واضح رہے کہ پاکستان کے معروف صحافی عارف نظامی نے کوئی ڈیڑھ ایک ماہ قبل ایک ٹیلی ویژن پروگرام میں گفتگو کرتے ہوئے دونوں میان بیوی کے درمیان طلاق ہونے کی سب سے پہلے خبر دی تھی لیکن عمران خان اس کی تردید کرتے رہے تھے اور اب اس کی تصدیق کر دی گئی ہے۔

اپنَے الگ ٹویٹ میں عمران خان نے اپنی دوسری شادی کے خاتمے کو اپنے اور خاندان کے لئے انتہائی افسوسناک قرار دیتے ہوئے درخواست کی ہے کہ ان کی نجی زندگی کے معاملات پر زیادہ بات نہ کی جائے۔

دوسری جانب ذرائع کا کہنا ہے کہ ریحام خان بنی گالہ میں تحریک انصاف کی سرگرمیوں سے بہت پریشان تھیں اور انہوں نے اسد عمر کا داخلہ بھی بنی گالہ میں بند کر دیا تھا اور دو روز قبل ریحام عالمی کانفرنس میں شرکت کے لئے برطانیہ روانہ ہو گئی تھیں۔