.

پاکستان میں دینی سیاسی اتحاد متحدہ مجلس عمل بحال: فضل الرحمان صدر منتخب

پہلی اشاعت: آخری اپ ڈیٹ:

پاکستان کی سرکردہ مذہبی سیاسی جماعتوں پر مشتمل سیاسی اتحاد متحدہ مجلس عمل کو بحال کردیا گیا۔ مولانا فضل الرحمان صدر لیاقت بلوچ جنرل سیکریٹری منتخب ہو گئے۔

کراچی میں پریس کانفرنس کے دوران جماعت اسلامی کے رہنما لیاقت بلوچ نے متحدہ مجلس عمل(ایم ایم اے) کی بحالی کا اعلان کیا۔لیاقت بلوچ نے ایم ایم اے کی مرکزی قیادت سے آگاہ کرتے ہوئے بتایا کہ جمعیت علمائے اسلام(ف) کے سربراہ مولانا فضل الرحمان کو ایم ایم اے کا صدر منتخب کیا گیا ہے جب کہ لیاقت بلوچ جنرل سیکریٹری منتخب ہوئے۔ ایم ایم اے کے جنرل سیکریٹری لیاقت بلوچ نے کہا کہ متحدہ مجلس عمل کا مرکزی ورکرز کنونشن اپریل کے پہلے ہفتے میں منعقد کیا جائے۔

اس موقع پر نیوز کانفرنس میں ایم ایم اے کے نو منتخب صدر مولانا فضل الرحمان نے کہا کہ پوری قوم کوایم ایم اے کی بحالی کی مبارک باد پیش کرتا ہوں، آج ہم نے نئے سفرکےآغاز کاعہد کردیا ہے۔ کوشش کریں گے کہ قوم کی امیدوں پرپورا اتریں۔ انہوں نے کہا کہ ہرسطح پر ایم ایم اے میں تنظیم سازی ہوگی، آئندہ انتخاب ایم ایم اے کے پرچم تلےلڑیں گے، ہم ملک میں نئی سیاست کا آغاز کرنے جا رہے ہیں، ہمیں امن اور خوشحالی کی ضرورت ہے۔

امیر جماعت اسلامی سراج الحق نے کہا کہ ایم ایم اے عام شہریوں کی ترجمانی کریگی، ہم ایک نئے عزم سے سفر کا آغاز کر رہے ہیں۔