سعودی عرب پاکستان کو تین ارب ڈالرز اور تیل کی موخر ادائی کی شکل میں امداد دینے پر متفق

پہلی اشاعت: آخری اپ ڈیٹ:
مطالعہ موڈ چلائیں
100% Font Size
3 منٹس read

سعودی عرب نے پاکستان کو ایک سال کے لیے تین ارب ڈالرز کی نقد رقم اور تیل کی درآمدات پر موخر ادائی کی شکل میں امداد دینے سے اتفاق کیا ہے تاکہ وہ درپیش مالیاتی بحران سے نمٹ سکے۔

حکومتِ پاکستان نے ایک بیان میں کہا ہے کہ وزیراعظم عمران خان کی سعودی قیادت کے ساتھ بات چیت کے دوران میں یہ اتفاق رائے ہوا ہے۔ انھوں نے الریاض میں سعودی شاہ سلمان بن عبدالعزیز اور ولی عہد شہزادہ محمد بن سلمان سے دو طرفہ تعلقات کے فروغ اور باہمی دلچسپی کے علاقائی اور عالمی امور پر تبادلہ خیال کیا ہے۔

پاکستان کے دفتر خارجہ نے ایک بیان میں اطلاع دی ہے :’’اس بات پر اتفاق ہو اہے کہ سعودی عرب ایک سال کی مدت کے لیے تین ارب ڈالرز کی رقم بنک دولت پاکستان میں جمع کرائے گا۔سعودی عرب یہ رقم پاکستان کو ادائیوں کے توازن کے لیے امداد کے طور پر دے گا‘‘۔

’’اس بات سے بھی اتفاق کیا گیا ہے کہ پاکستان تیل کی درآمدات پر رقم ایک سال کی تاخیر سے ادا کرے گا اور وہ سعودی عرب سے تین ارب ڈالرز مالیت کا تیل درآمد کرسکے گا۔ یہ انتظام تین سال کے لیے ہوگا اور اس کے بعد اس کا ازسرنو جائزہ لیا جائے گا‘‘۔بیان میں مزید کہا گیا ہے۔

عمران خان نے الریاض میں منعقدہ ’سعودی مستقبل سرمایہ کاری اقدام فورم‘ میں بھی شرکت کی ہے۔اس فورم کے تین روزہ دوسرے ایڈیشن کا آج منگل کو آغاز ہوا ہے۔انھوں نے فورم میں گفتگو کرتے ہوئے کہا کہ پاکستان کو قرضے کے بحران سے نکلنے کے لیے مزید قرض کی ضرورت ہے۔

مقبول خبریں اہم خبریں

مقبول خبریں