.

پاکستان میں شوّال کا چاند نظرآگیا، اتوار کوعیدالفطر منانے کا اعلان

پہلی اشاعت: آخری اپ ڈیٹ:

پاکستان میں شوّال المکرم کا چاند نظر آگیا ہے اور اتوار کو ملک بھر میں مذہبی جوش وعقیدت سے عیدالفطر منائی جارہی ہے۔

پاکستان کی مرکزی رؤیت ہلال کمیٹی کے چئیرمین مفتی منیب الرحمان نے ہفتے کی شب قریباً دس بجے نئے قمری مہینے کا چاند نظر آنے کا اعلان کیا ہے۔ان کے زیر صدارت مرکزی کمیٹی کا اجلاس کراچی میں ہوا اور زونل رؤیت ہلال کمیٹیوں کے اجلاس علاقائی صدردفاتر میں منعقد ہوئے ہیں۔

مفتی منیب الرحمان نے صوبہ بلوچستان کے علاقے چمن اور ملک کے بعض دوسرے علاقوں سے چاند دیکھنے کی شہادتیں موصول ہونے اور ان کے جائزے کے بعد عید الفطر کا اعلان کیا ہے۔

قبل ازیں وفاقی وزیر برائے سائنس اور ٹیکنالوجی فواد چودھری نے از خود ہی اتوار کو عیدالفطر منانے کا اعلان کردیا تھا۔ انھوں نے اسلام آباد میں ایک نیوز کانفرنس میں ملک کے آٹھ علاقوں کی نشان دہی کی تھی ، جہاں ان کے بہ قول شوّال کا چاند نظر آنے کا قوی امکان ہے۔

ان کا کہنا تھا کہ’’ پاکستان کو24 مئی ہی کو عید منانی چاہیے خواہ چاند نظر آتا ہے یا نہیں آتا ہے،یہ ایک غیر متعلقہ چیز ہے۔‘‘

انھوں نے یہ دعویٰ کیا کہ یہ پہلا موقع ہوگا مسلم ممالک میں ایک ہی دن میں عیدالفطر منائی جائے گی لیکن پاکستان میں رمضان کے انتیس روزے ہوئے ہیں اور سعودی عرب سمیت عرب اور دوسرے ممالک میں رمضان المبارک کے تیس روزے ہوئے ہیں اور وہاں بھی اتوار کو عیدالفطر منائی جارہی ہے۔

دوسری جانب وفاقی وزیر برائے مذہبی امور اور بین المذاہب ہم آہنگی نورالحق قادری نے فواد چودھری کے اس اعلان کی تائید نہیں کی تھی۔ان کا کہنا تھا کہ عید کا فیصلہ علماء کو کرنا چاہیے۔انھوں نے ایک بیان میں کہا کہ پاکستان کی حکومت اور عوام کو رؤیت ہلال کمیٹی کے فیصلے کے مطابق عید منانی چاہیے۔

پاکستان کے پڑوسی ملک بھارت میں عیدالفطر سوموار کو منائی جائے گی۔اس کی مرکزی رؤیت ہلال کمیٹی کے چئیرمین سید احمد بخاری اور تاریخی دینی دانش گاہ دارالعلوم دیوبند کی رؤیت ہلال کمیٹی نے ہفتے کی شام شوّال کا چاند نظر نہ آنے کا اعلان کیا ہے۔