وفاقی وزیرتعلیم شفقت محمودکا کہنا ہے کہ حکومت پاکستان نے کرونا وبا کے بڑھتے کیسزکے پیش نظر26 نومبرسے تمام تعلیمی ادارے بند کرنے کا فیصلہ کیا گیا ہے۔
پیر کے روز ہونے والے اجلاس میں فیصلہ کیا گیا کہ تعلیمی اداروں میں 26 نومبر سے 24 دسمبر تک آن لائن تعلیم کا سلسلہ جاری رہے گا جس کے بعد 25 دسمبر سے 10 جنوری تک موسم سرما کی سالانہ چھٹیاں ہوں گی۔ جنوری کے پہلے ہفتے میں صورتحال کا جائزہ لینے کے لئے ریویو سیشن ہوگا اور صورتحال کے بہتر ہونے کی صورت میں 11 جنوری کو تمام تعلیمی ادارے کھل جائیں گے۔
وزیر تعلیم کے مطابق عمومی طور پر مارچ اوراپریل میں ہونے والے بورڈ کے امتحانات کومئی میں کرانے کی سفارش کی ہے۔ اس کے علاوہ یونیورسٹی ہاسٹلزکے طلبہ کا ایک تہائی حصہ ہاسٹلزمیں قیام کرسکیں گے اور نوکریوں کے سلسلہ میں ہونے والے ٹیسٹ جاری رہیں گے۔
شفقت محمود کا کہنا ہے کہ اساتذہ کو بلانے کے حوالے سے اسکول انتظامیہ فیصلہ کرے گی۔ ان کا مزید کہنا تھا کہ نیا تعلیمی سال کو اگست میں لے جانے کے حوالے سے تجویز زیر غور ہے۔
کرونا وائرس کی صورتحال سے نمٹنے کے لئے تیار کردہ نیشنل کمانڈ اینڈ آپریشن سینٹر (این سی او سی) پہلے ہی تعلیمی ادارے فوری بند کرنے کی سفارش کرچکا ہے۔
