.

کرونا وائرس کے وار جاری، 57 افراد جاں بحق، مزید 1502 کیسز رپورٹ

پہلی اشاعت: آخری اپ ڈیٹ:

عالمی وبا کرونا وائرس کے سبب پاکستان میں مزید 57 اموات اور ایک ہزار 502 نئے کیسز سامنے آئے ہیں۔

نیشنل کمانڈ اینڈ کنٹرول سینٹر کے مطابق پاکستان میں کرونا سے اموات کی مجموعی تعداد 12 ہزار 185 تک پہنچ گئی جبکہ متاثرہ افراد کی مجموعی تعداد 5 لاکھ 59 ہزار 93 ہو گئی ہے۔

ملک میں کرونا سے 5 لاکھ 16 ہزار 683 افراد صحتیاب ہو چکے ہیں اور زیر علاج مریضوں کی تعداد 30 ہزار 225 ہے۔

کرونا کے سبب سب سے زیادہ اموات پنجاب میں ہوئی ہیں جہاں 4 ہزار 982 افراد جان کی بازی ہار چکے ہیں جبکہ سندھ میں 4 ہزار 171، خیبر پختونخوا میں ایک ہزار 976، اسلام آباد میں 481، گلگت بلتستان میں 102، بلوچستان میں 197 اور آزاد کشمیر میں 276 افراد جان کی بازی ہار چکے ہیں۔

اسلام آباد میں کرونا کیسز کی تعداد 42 ہزار 279، خیبر پختونخوا میں 68 ہزار 972، سندھ میں 2 لاکھ 52 ہزار 296، پنجاب میں ایک لاکھ 62 ہزار 391، بلوچستان میں 18 ہزار 898، آزاد کشمیر میں 9 ہزار 334 اور گلگت بلتستان میں 4 ہزار 923 افراد کرونا سے متاثر ہوچکے ہیں۔

کرونا کی دوسری لہر کے دوران مثبت کیسز میں نمایاں کمی ہوئی اور شرح تین اعشاریہ نو فیصد ہو گئی ہے۔ صورتحال 10 نومبر سے قبل کے حالات کی جانب واپس آ گئی ہے۔

نیشنل کمانڈ اینڈ اپریشن سینٹر کے مطابق کراچی میں کورونا کے مثبت کیسز کی شرح 10.68 فیصد ہے۔ اسلام آباد میں 1.18فیصد، خیبر پختونخوا میں 5.25، پنجاب5.97 اور سندھ میں مجموعی طور پر مثبت کیسز کی شرح 10.23 فیصد ہے۔

آزاد کشمیر میں کرونا کے مثبت کیسز کی شرح 5.97، بلوچستان 3.52 اور گلگت بلتستان میں 0.56 فیصد ہے۔

پاکستان میں کرونا کی ویکسینیشن جاری ہے اور پہلے مرحلے میں ہیلتھ ورکرز کو کورونا ویکسین لگائی جا رہی ہے۔ ملک بھر میں ایڈلٹ ویکسی نیشن مراکز قائم کیے جا چکے ہیں اور ویکسی نیشن کا تمام تر عمل ڈیجیٹل میکنزم سے کنٹرول کیا جائے گا۔

ویکسینیشن کے پہلے مرحلے کے لیے پنجاب میں 189 اور سندھ میں 14 مراکز قائم کیے گئے ہیں جبکہ خیبر پختونخوا میں 280، بلوچستان میں 44 اور اسلام آباد میں 14 ویکسینیشن سینٹر قائم کیے جا چکے ہیں۔ آزاد کشمیر میں 25 اور گلگت بلتستان میں بھی 16 مراکز کے ذریعے ویکسی نیشن کی جائے گی۔