سعودی فضائیہ کا دستہ دو ہفتوں پر محیط کثیر ملکی فوجی مشق ’ایسز میٹ 1-2021‘ میں شرکت کے لیے سنیچر کو پاکستان فضائیہ کے آپریشنل بیس پر پہنچ گیا ہے۔
پاکستان میں سعودی سفارت خانے کے ملٹری اتاشی میجر جنرل عوض الزھرانی اور مشترکہ فضائی مشقوں میں شامل دستے کے سربراہ لیفٹیننٹ کرنل فاتح الروقی نے سعودی دستے کا آپریشنل بیس پہنچنے پر خیر مقدم کیا۔
پاکستان فضائیہ کے ترجمان کے مطابق پاکستان فضائیہ، امریکی فضائیہ اور سعودی فضائیہ ان مشقوں میں حصہ لے رہی ہیں۔
مصر، اردن اور بحرین کی فضائیہ کو بطور مبصر ان مشقوں میں شرکت کی دعوت دی گئی ہے۔
مشقوں کا بنیادی مقصد شرکا کے انفرادی تجربات سے استفادہ حاصل کرتے ہوئے باہمی اشتراک کو فروغ دینا اور حقیقت سے قریب تر ماحول میں تربیت کی فراہمی ہے۔
پاک فضائیہ کے مطابق کہ سعودی عرب کی فضائیہ کے ساتھ ہونے والی یہ اس سال کی پہلی مشقیں ہیں۔ ’اسی لیے انہیں 2021-1 کا نام دیا گیا ہے۔‘
ترجمان کے مطابق رواں سال میں سعودی اور پاکستانی فضائیہ کی مزید مشترکہ مشقیں بھی متوقع ہیں۔
