سعودی وزیرخارجہ شہزادہ فیصل کی پاکستانی ہم منصب سے دوطرفہ تعلقات پربات چیت

پہلی اشاعت: آخری اپ ڈیٹ:
مطالعہ موڈ چلائیں
100% Font Size
دو منٹ read

سعودی عرب کے وزیرخارجہ شہزادہ فیصل بن فرحان نے پاکستانی ہم منصب شاہ محمود قریشی سے ہفتے کے روز ٹیلی فون پر گفتگو کی ہے اور ان سے دونوں ملکوں کے درمیان تاریخی دوستانہ تعلقات کے مختلف پہلووں کے بارے میں تبادلہ خیال کیا ہے۔

شاہ محمود قریشی نے شہزادہ فیصل سے گفتگو کرتے ہوئے پاکستان کی قیادت کی جانب سے خادم الحرمین الشریفین شاہ سلمان بن عبدالعزیز اور ولی عہد شہزادہ محمد بن سلمان کے لیے نیک خواہشات کا اظہار کیا ہے۔

پاکستان کے دفترخارجہ نے ایک بیان میں کہا ہے کہ شہزادہ فیصل بن فرحان نے وزیرخارجہ قریشی کو اس سال حج کے انعقاد کے سلسلے میں درپیش چیلنجز اور صحتِ عامہ کے ضمن میں سعودی حکومت کے اقدامات سے آگاہ کیا ہے۔

شاہ محمود قریشی نے کہا کہ وہ اس تمام صورت حال کو سمجھتے ہیں۔انھوں نے خادم الحرمین الشریفیں کے عوامی مفاد میں کیے گئے فیصلوں پربھرپوراعتماد کا اظہار کیا ہے۔

دونوں وزرائے خارجہ نے وزیراعظم عمران خان کے سعودی عرب کے حالیہ کامیاب دورے کے حاصلات کا بھی جائزہ لیا ہے اور انھوں نے دونوں ملکوں کی قیادت کے فیصلوں پر جلد اورمؤثرانداز میں عمل درآمد سے اتفاق کیا ہے۔شاہ محمود قریشی نے پاکستان کی جانب سے سعودی عرب کی خودمختاری اور علاقائی سالمیت کی حمایت کے عزم کا اعادہ کیا ہے۔

دونوں وزرائے خارجہ نے مختلف شعبوں میں دوطرفہ تعاون کے فروغ اور کثیرقومی تنظیموں میں دونوں ملکوں کے درمیان مربوط تعاون پربھی تبادلہ خیال کیا ہے اور باہمی مفاد کے عالمی اور علاقائی امور کے بارے میں بات چیت کی ہے۔

مقبول خبریں اہم خبریں

مقبول خبریں