.

پاکستان کے زیر انتظام کشمیر میں پولنگ جاری، 45 نشستوں پر 707 امیدواران

پہلی اشاعت: آخری اپ ڈیٹ:

پاکستان کے زیر انتظام کشمیر میں عام انتخابات کے لیے پولنگ کا سلسلہ جاری ہے۔ قانون ساز اسمبلی کی 45 حلقوں میں رجسٹرڈ 32 لاکھ سے زائد ووٹرز اپنا حق رائے دہی استعمال کر رہے ہیں، جب کہ انتخابات میں 707 امیدواران حصہ لے رہے ہیں جن میں پاکستان کے وفاق میں حکمران جماعت پاکستان تحریک انصاف، اپوزیشن جماعتیں مسلم لیگ نواز، پیپلز پارٹی اور مقامی جماعت مسلم کانفرنس سمیت 33 جماعتوں اور آزاد حیثیت میں الیکشن میں حصہ لینے والے امیدوار شامل ہیں۔

کشمیر کے الیکشن کمیشن نے پولنگ کے لیے تمام انتظامات مکمل کر لئے ہیں اور 6139 پولنگ اسٹیشنز پر موجود پولنگ عملے کو تمام سامان فراہم کر دیا گیا ہے۔ تمام نشستوں پر پولنگ صبح 8 بجے شروع ہوئی جو بغیر کسی وقفے کے شام 5 بجے تک جاری رہے گی۔

انتخابی عمل کو شفاف بنانے کے لیے پریذائیڈنگ آفیسرز سمیت 250 افسران کو مجسٹریٹ کے برابر اختیارات دیئے گئے ہیں۔ اس کے علاوہ پاک فوج، رینجرز سمیت 40 ہزار مقامی پولیس اہلکاروں کو سیکیورٹی کے لئے تعینات کیا گیا ہے۔

قانون ساز اسمبلی کے انتخابات کے لیے پاکستان کے علاقوں کراچی، لاہور، گوجرانوالا، گجرات، سیالکوٹ، حافظ آباد اور نارووال میں بھی پولنگ ہو رہی ہے۔