فن کے شعبے میں عمر شریف کی خدمات کو ہمیشہ یاد رکھا جائے: عمران خان

پاکستان کے صدر ڈاکٹر عارف علوی اور وزیر اعظم عمران خان نے کامیڈی کنگ عمر شریف کےانتقال پر اظہارافسوس کرتے ہوئے کہا ہے کہ ’’فن کے شعبے میں عمر شریف کی خدمات کو ہمیشہ یاد رکھا جائے گا۔‘‘

وزیر اعظم خان نے کامیڈی کنگ عمر شریف کے انتقال پر اظہار افسوس کرتے ہوئے اہل خانہ سے تعزیت کا اظہار کیا اور عمر شریف کے لیے مغفرت کی دعا کی۔

عمران خان نے اپنے پیغام میں کہا کہ عمر شریف بے شمار صلاحیتوں کے مالک اور فنون لطیفہ کی دنیا میں منفرد مقام رکھتے تھے۔ فن کے شعبے میں عمر شریف کی خدمات کو ہمیشہ یاد رکھا جائے گا۔

صدر مملکت عارف علوی نے عمر شریف کےانتقال پر اظہار افسوس کرتے ہوئے کہا عمر شریف منفرد حس مزاح کے مالک تھے۔ اللہ مرحوم کو غریق رحمت کرے،اہل خانہ کو صبر عطا فرمائے۔

ادھر پاکستان کے عالمی شہرت یافتہ کامیڈین کے انتقال پر زندگی کے مختلف شعبوں سے تعلق رکھنے والے افراد کی جانب سے تعزیت کے اظہار کا سلسلہ جاری ہے۔

پاکستان کے جرمنی میں سفیر ڈاکٹر محمد فیصل نے اپنے ٹوئٹر اکائونٹ سے عمر شریف کے انتقال کی خبر دیتے ہوئے سینئر اداکار کے خاندان اور دوستوں سے تعزیت کی۔

پاکستان میں جرمنی کے سفیر برنھارڈ شلاگھیک نے عمر شریف کی موت کو پاکستان کی تفریحی صنعت کا بڑا نقصان قرار دیا۔

بھارتی گلوکار دلیر مہندی نے اپنے ویڈیو پیغام میں کہا کہ آج بہت ہی دکھ کا دن ہے۔ ابھی پتہ چلا ہے کہ عمر شریف ہم میں نہیں رہے۔ عمران خان کا مشکور ہوں کہ انہوں نے عمر شریف کی امریکا منتقلی کی کوششیں کیں۔

اداکار ہمایوں سعید نے کہا کہ عمر شریف کے انتقال پر بہت افسوس ہوا، وہ بلاشبہ کامیڈی کنگ تھے۔ میں ان کی وفات پر بہت غمگین ہوں۔ اللہ ان کی روح کو بخش دے۔

گلوکار و اداکار علی ظفر کا کہنا تھا کہ عمر شریف کی وفات پر الفاظ نہیں ہیں۔ اللہ ان کے درجات بلند کریں اور ان کے خاندان کو صبر دیں۔ آمین۔

پاکستان تحریک انصاف کے رہنما اور گلوکار ابرار الحق نے پیغام دیا کہ "ہمیں ہنسانے والا ہمیں رلا کر چلا گیا۔"