صدر پاکستان کی سبکدوش ترک سفیر سے الوداعی ملاقات

صدر مملکت عارف علوی نے ترکیہ کے سبکدوش ہونے والے سفیر احسان مصطفیٰ یرادکل سے اسلام آباد میں الوداعی ملاقات کی۔

ملاقات کے دوران صدر پاکستان نے پاک-ترک باہمی تعلقات میں فروغ کے لئے سفیر کی ذاتی کاوشوں کی تعریف کرتے ہوئے ان کی مدت ملازمت کی تکمیل پر مبارکباد دی۔

صدر عارف علوی کا کہنا تھا کہ "پاکستان اور ترکیہ سماجی و مذہبی اقدار پر مبنی مثالی تعلقات کے حامل ہیں۔ پاکستان اور ترکیہ کے برادرانہ تعلقات دونوں ممالک کے عوام کے دلوں میں بستے ہیں ، دونوں قومیں مشترکہ سماجی، ثقافتی اور مذہبی اقدار پر مبنی مثالی دوستانہ تعلقات کی حامل ہیں ، امید ہے کہ باہمی طور پر فائدہ مند کثیر الجہتی تعلقات مستقبل میں بھی مضبوط سے مضبوط تر ہوں گے۔"

صدر مملکت نے تنازعہ جموں و کشمیر پر ترکیہ کی جانب سے پاکستان کی مستقل حمایت کا بھی شکریہ ادا کیا۔