ٹی وی چینل کی خاتون رپورٹرعمران خان کے کنٹینر تلے کچل کرجاں بحق

پہلی اشاعت: آخری اپ ڈیٹ:
مطالعہ موڈ چلائیں
100% Font Size
دو منٹ read

پاکستان تحریک انصاف(پی ٹی آئی) کے لاہور سے اسلام آباد کی طرف لانگ مارچ کی کوریج کے دوران میں نجی ٹی وی چینل فائیو کی خاتون رپورٹر صدف نعیم حادثے میں جاں بحق ہوگئی ہیں۔

لاہور سے نشریات پیش کرنے والے چینل فائیو کے مطابق صدف نعیم پی ٹی آئی کے چیئرمین عمران خان کے کنٹینرتلے کچلی گئی ہیں۔بعض عینی شاہدین نے بتایا ہے کہ وہ اس کنٹینرپرسوار ہونے کی کوشش کررہی تھیں۔اس دوران میں عمران خان کے کسی محافظ نے انھیں دھکا دے دیا اور وہاں سے نیچے گرگئی تھیں جبکہ بعض اطلاعات میں بتایا گیا ہے کہ وہ اس کے ساتھ ساتھ چل رہی تھیں،دھکم پیل میں وہ نیچے گرگئی تھیں اورکنٹینر نے انھیں کچل دیا۔وہ موقع پر ہی جاں بحق ہوگئی تھیں۔

پی ٹی آئی کے لیڈر فوادچودھری نے اس حادثے کی تصدیق کی ہے اور بتایا کہ یہ واقعہ ضلع گوجرانوالہ میں واقع قصبے سادھوکی کے نزدیک پیش آیا ہے۔

صدف نعیم کی ناگہانی موت پر وزیراعظم میاں شہبازشریف نے گہرے دکھ اور افسوس کا اظہار کیا ہے اور ان کے لواحقین سے تعزیت کا اظہارکیا ہے۔

عمران خان نے بھی ان کی ناگہانی موت پر افسوس کا اظہار کیا ہے اور کہا کہ ان کے پاس تعزیت کے لیے الفاظ نہیں ہیں۔انھوں نے خاتون رپورٹر کی موت کی اطلاع ملنے کے بعد اتوارکی شام اپنامارچ منسوخ کردیاہے اور کہا ہے کہ وہ سوموار کو اپنے مارچ کا سفر جاری رکھیں گے۔

پاکستان کی صحافتی برادری نے صدف نعیم کی پیشہ ورانہ فرائض کی انجام دہی کے دوران میں حادثاتی وفات پر گہرے دکھ اور افسوس کا اظہارکیا ہے اور اس واقعہ کی مکمل تحقیقات کا مطالبہ کیا ہے۔متوفیہ شادی شدہ اور چاربچّوں کی ماں تھیں۔

مقبول خبریں اہم خبریں

مقبول خبریں