عمران خان، بشریٰ بی بی سمیت 80 سے زیادہ افراد کے بیرون ملک سفر پرپابندی عاید

حکومتِ پاکستان نے سابق وزیراعظم اور تحریک انصاف (پی ٹی آئی) کے چیئرمین عمران خان اور ان کی اہلیہ بشریٰ بی بی سمیت 80 سے زیادہ افراد کے بیرون ملک سفر پر پابندی عاید کردی ہے اور ان کے نام نو فلائی لسٹ میں ڈال دیے ہیں۔

وزیراعظم کے معاون خصوصی عطاءاللہ تارڑ نے حکومت کے اس اقدام کی تصدیق کی ہے اور بتایا کہ پی ٹی آئی کے مختلف عہدے داروں اور سابق ارکان اسمبلی اسد عمر، ملیکہ بخاری، قاسم سوری، اسد قیصر، مراد سعید، حماد اظہر، یاسمین راشد اور اسلم اقبال کے نام ایگزٹ کنٹرول لسٹ (ای سی ایل) میں شامل کیے گئے ہیں۔

انھوں نے کہا کہ پی ٹی آئی کے اس پابندی کی زد میں آنے والے تمام ارکان کی فہرست ملک کے تمام ایگزٹ پوائنٹس اور ہوائی اڈوں پر بھیج دی گئی ہے۔

معاون خصوصی نے مزید کہا کہ وزارت داخلہ نے متعلقہ حکام کو یہ احکامات جاری کردیے ہیں کہ ان میں سے کسی کو بھی پاکستان چھوڑنے کی اجازت نہیں دی جائے گی۔