پاکستان ہر عالمی فورم پر فلسطینی عوام کے لئے آواز اٹھاتا رہے گا: شہباز شریف

غزہ کے عوام کے لئے امداد کی مزید ایک قسط عید کے بعد بھیجی جائے گی: وزیراعظم پاکستان

پہلی اشاعت: آخری اپ ڈیٹ:
مطالعہ موڈ چلائیں
100% Font Size
3 منٹس read

وزیر اعظم محمد شہباز شریف نے فلسطینی سفیر کو یقین دلایا ہے کہ پاکستان ہر عالمی فورم پر فلسطینی عوام کے ساتھ یکجہتی کے لئے آواز اٹھاتا رہے گا،پاکستان نے غزہ کے عوام کے لئے امدادی سامان کی سات قسطیں ارسال کی ہیں جبکہ مزید ایک عید کے بعد بھیجی جائے گی۔

وزیر اعظم آفس کے میڈیا ونگ سے جاری بیان کے مطابق جمعرات کو وزیر اعظم محمد شہباز شریف پاکستان میں فلسطین کے سفیر احمد جواد ربعی نے ملاقات کی۔اس موقع پر وزیر خارجہ اسحاق ڈار، وزیر اعظم نے معاون خصوصی طارق فاطمی اور سیکرٹری خارجہ بھی موجود تھے۔

وزیر اعظم نے فلسطین کے صدر ڈاکٹر محمود عباس کی جانب سے ان کے دوسری بار وزیر اعظم کا منصب سنبھالنے پر تہنیتی پیغام پر ان کا شکریہ اداکیا۔انہوں نے کہا کہ پاکستان کے فلسطین کے ساتھ تاریخی اور قریبی برادرانہ تعلقات ہیں اور پاکستان تسلسل سے مسئلہ فلسطین کی اقوام متحدہ ،او آئی سی سمیت تمام عالمی فورمز پر حمایت جاری رکھے ہوئے ہے۔

وزیر اعظم نے سات اکتوبر 2023 سے غزہ میں تسلسل سے جاری حالیہ اسرائیلی بربریت کی مذمت کرتے ہوئے کہا کہ بہادر اور معصوم فلسطینیوں پر یہ اسرائیلی بربریت فی الفور بند ہونی چاہیے۔ انہوں نے 17 ہزار بچوں سمیت 32 ہزار فلسطینیوں کی بہیمانہ اموات پر تعزیت کا اظہاراور اسرائیلی سیکیورٹی فورسز کی ظالمانہ کارروائیوں سے 70 ہزار زخمیوں کی جلد صحت یابی کی دعا کی۔

وزیر اعظم نے عالمی عدالت انصاف میں جنوبی افریقہ کی جانب سے کیس دائر کرنے اور اس فورم پر فلسطین کی حمایت میں پاکستان کی جانب سے دیئے گئے بیان کا حوالہ دیا۔اقوام متحدہ کی جانب سے اقوام متحدہ کی سلامتی کونسل کی جانب سے منظور کی گئی جنگ بندی کی قرارداد کا خیر مقدم کرتے ہوئے اسرائیل کی جانب سے اس قرار داد کو نظر انداز کرنے کے اسرائیلی رویہ پر ناپسندیدگی کا اظہار کرتے ہوئے کہا کہ اس قراداد کے باوجود اسرائیلی بربریت جاری ہے۔

انہوں نے فلسطینی سفیر کو یقین دلایا ہے کہ پاکستان ہر عالمی فورم پر فلسطینی عوام کے ساتھ یکجہتی کے لئے آواز اٹھاتا رہے گا۔پاکستان نے غزہ کے عوام کے لئے امدادی سامان کی سات قسطیں ارسال کی ہیں جبکہ مزید ایک عید کے بعد بھیجی جائے گی۔

فلسطینی سفیر نے وزیر اعظم اور پاکستان کے عوام کی جانب سے فلسطین کے عوام کی مدد پر شکریہ ادا کرتے ہوئے کہا کہ مشکل کی اس گھڑی میں اس سے فلسطینیوں کا حوصلہ بلند ہوا ہے۔

مقبول خبریں اہم خبریں

مقبول خبریں