• صفحہ اول
• ایڈیٹر کی پسند

کدو کے بیج حجم میں چھوٹے دکھائی دیتے ہیں لیکن ان کے صحت بخش فوائد بہت بڑے ہیں۔ بہت سے لوگ جانتے ہیں کہ یہ سبز اور کرکرے بیج خون میں شکر کی سطح کو متوازن رکھنے میں مدد دیتے ہیں، مگر ان کے فوائد اس سے کہیں زیادہ ہیں۔

امریکی معدے کے امراض کے ماہر ڈاکٹر پال مانیکام کے مطابق کدو کے بیج اُن بہترین غذاؤں میں سے ہیں جنھیں ان کی اصل قدر نہیں دی جاتی، حالانکہ انہیں بہت آسانی سے روزمرہ کی خوراک میں شامل کیا جا سکتا ہے اور ان کی قیمت بھی مناسب ہے۔ یہ بات Economic Times کی رپورٹ میں بتائی گئی۔

انسٹاگرام پر جاری ایک حالیہ وڈیو اور پلیٹ فارم "ایکس" پر کی گئی پوسٹ میں ڈاکٹر پال نے سات سائنسی اور ثابت شدہ وجوہات بیان کیں کہ کدو کے بیجوں کو روزمرہ معمول کا حصہ کیوں بنایا جانا چاہیے :

1 - قوتِ مدافعت میں اضافہ

کدو کے بیج زنک سے بھرپور ہوتے ہیں۔ یہ ایک بنیادی معدنی عنصر ہے اور مدافعتی نظام کو مضبوط بناتا ہے تاکہ جسم مؤثر طریقے سے انفیکشن کا مقابلہ کر سکے۔ انھیں کھانے میں شامل کرنا موسمی بیماریوں سے بچنے کا مزے دار طریقہ ہو سکتا ہے۔

2 - دل کی صحت کی حفاظت

مگنیشیئم کی زیادہ مقدار کی وجہ سے کدو کے بیج دل کی دھڑکن کو معمول پر رکھنے اور بلڈ پریشر کو متوازن رکھنے میں مدد دیتے ہیں۔ مگنیشیئم عمومی طور پر دل اور خون کی نالیوں کی صحت کے لیے بھی اہم ہے۔

3 - مزاج کی بہتری

کدو کے بیجوں میں ٹرپٹوفان پایا جاتا ہے، جو ایک امائنو ایسڈ ہے اور سیرٹونن (یعنی "خوشی کا ہارمون") میں تبدیل ہو جاتا ہے۔ یہ عمل مزاج بہتر بنانے، گھبراہٹ کم کرنے اور نیند کے معیار کو بہتر کرنے میں مدد دیتا ہے۔

4 - ہڈیوں کو مضبوط بنانا

کدو کے بیج فاسفورس اور مگنیشیئم کی اچھی مقدار فراہم کرتے ہیں، جو ہڈیوں کی مضبوطی اور کثافت کے لیے ضروری ہیں۔ ان کا باقاعدہ استعمال بڑھتی عمر میں ہڈیوں کے بھربھرے پن جیسی بیماریوں کے خطرات کو کم کر سکتا ہے۔

5 - خون میں شکر کا توازن

کدو کے بیج انسولین کی سطح کو منظم رکھنے اور خون میں شکر کی مقدار کو نارمل رکھنے میں مدد کرتے ہیں۔ یہ ذیابیطس یا اس کی ابتدائی حالت کے شکار افراد کے لیے مثالی ہلکی غذا ہیں۔

6 - وزن کم کرنے میں مدد گار

ڈاکٹر پال کے مطابق ان کی پسندیدہ خاصیت یہ ہے کہ کدو کے بیج کھانے کی خواہش کو قابو میں رکھتے ہیں۔ صحت مند چکنائیوں اور پروٹین سے بھرپور ہونے کی وجہ سے یہ بیج طویل وقت تک پیٹ بھرا محسوس کراتے ہیں، جس سے غیر ضروری یا زیادہ کھانے سے بچنا آسان ہو جاتا ہے۔

7 - جلد اور آنکھوں کی حفاظت

کدو کے بیج اینٹی آکسیڈنٹس جیسے وٹامن ای اور کیروٹینائڈز سے بھرپور ہوتے ہیں۔ یہ سوزش کو کم کرتے ہیں، بڑھاپے کی علامات کو سست کرتے ہیں اور آنکھوں اور جلد کو ماحولیاتی نقصانات سے محفوظ رکھتے ہیں۔