• صفحہ اول
• ایڈیٹر کی پسند

کیلیفورنیا میں قائم روبوٹکس کے شعبے میں ابھرتی ہوئی کمپنی "کیو" (Queue) نے دنیا کی پہلی مکمل طور پر خودکار روبوٹک فارمیسی متعارف کرا دی ہے۔ اسے ادویات کی فراہمی، ان کی تصدیق اور ترسیل کو خودکار بنانے کے لیے ڈیزائن کیا گیا ہے۔

یہ پلیٹ فارم ڈسٹری بیوشن کمپنیوں سے آنے والے ادویات کے اصل بند پیکٹ وصول کرتا ہے اور پھر نسخوں کی تصدیق کے بعد کم سے کم انسانی مداخلت کے ساتھ ادویات کی پیکنگ اور فراہمی کی ذمہ داری سنبھالتا ہے۔

کمپنی کا کہنا ہے کہ اس ٹیکنالوجی کا مقصد فارمیسیوں کے آپریشنل اخراجات کو کم کرنا، ادویات کی فراہمی کی درستی کو بہتر بنانا اور مریضوں کی ضرورت کے مقامات کے قریب خودکار فارمیسیاں چلانے کے قابل بنا کر تجویز کردہ ادویات کی خدمات تک رسائی کو وسیع کرنا ہے۔

یہ معلومات ٹیکنالوجی اور ایجادات کی خبروں کے لیے مخصوص ویب سائٹ ’’ انٹرسٹنگ انجینئرنگ ‘‘ کی ایک رپورٹ کے مطابق ہیں۔ اس رپورٹ کا ’’ العربیہ بزنس ‘‘ نے جائزہ لیا ہے۔ کمپنی نے یہ اعلان بھی کیا ہے کہ اس نے نظام کی ترقی اور اس کی تنصیب کو تیز کرنے کے لیے 12.6 ملین ڈالر کا سرمایہ جمع کیا ہے۔

ادویات کی خود کار فراہمی

یہ نظام ادویات کی فراہمی کے پورے عمل کو خودکار بنانے کے لیے ڈیزائن کیا گیا ہے۔ اس کا آغاز ادویات کے اصل بند پیکٹوں کو سنبھالنے سے لے کر، کم سے کم انسانی مداخلت کے ساتھ ادویات کے تیار اور تصدیق شدہ پیکٹ بنانے تک ہوتا ہے۔ فارمیسی کو خودکار بنانے والے روایتی نظاموں ، جو عام طور پر الگ الگ کاموں کو انجام دینے میں مدد کرتے ہیں، کے برعکس ’’ کیو‘‘کا نظام ادویات کی فراہمی، ان کی تصدیق اور انہیں تیار کرنے کے عمل کو ایک ہی آزاد ورک فلو میں یکجا کرتا ہے۔ ادویات اس نظام میں اپنے اصل بند پیکٹوں کے اندر داخل ہوتی ہیں جہاں روبوٹ، کمپیوٹر ویژن ٹیکنالوجیز اور خودکار طریقے سے سنبھالنے کے طریقہ کار مریض کے لیے ادویات کے تیار پیکٹ بنانے سے پہلے ذخیرہ اندوزی، گنتی، فراہمی اور تصدیق کے عمل کو سنبھالتے ہیں۔

یہ نظام فی الحال امریکہ میں ڈاکٹروں کی جانب سے سب سے زیادہ تجویز کی جانے والی 250 ادویات کو سپورٹ کرتا ہے۔ یہ نظام روزمرہ کے نسخوں کے ایک بڑے حصے کا احاطہ کرتا ہے۔ اس نظام میں حفاظت اور تصدیق کے کئی خودکار مراحل بھی شامل ہیں جنہیں ادویات کی فراہمی کی غلطیوں کو کم کرنے اور تیاری کے پورے عمل کے دوران فراہمی کی درستی کو برقرار رکھنے کے لیے ڈیزائن کیا گیا ہے۔

"کیو" کا کہنا ہے کہ روبوٹک فارمیسی روایتی فارمیسیوں کے آپریشنز کے مقابلے میں نسخے تیار کرنے کے اخراجات کو 96 فیصد تک کم کرنے کی صلاحیت رکھتی ہے۔ اس ماڈیولر نظام کو ریٹیل فارمیسیوں، ہسپتالوں، کلینکس اور دیہی علاقوں میں صحت کی سہولیات میں استعمال کے لیے ڈیزائن کیا گیا ہے۔ اس نظام سے فارمیسیوں میں روایتی عملے کے ماڈل کی ضرورت کے بغیر مریضوں کے قریب ادویات کی فراہمی کی خدمات فراہم کرنا ممکن ہو جاتا ہے۔

کمپنی پہلے ہی اس نظام کا ایک فعال تجارتی ماڈل تیار کر چکی ہے اور اس نے اپنے پہلے گاہک کے طور پر فارمیسیوں کی ایک بڑی قومی زنجیر کے ساتھ معاہدہ کیا ہے جو حقیقی فارمیسی ماحول میں اس ٹیکنالوجی کی تاثیر کا پہلا عملی ثبوت ہے۔ اب نیا سرمایہ پروڈکٹ کی مزید ترقی، کارپوریٹ فارمیسی گاہکوں کے ہاں اس کی تنصیب کے دائرے کو وسیع کرنے اور روبوٹکس، ہارڈ ویئر، سافٹ ویئر اور فارمیسی آپریشنز کے شعبوں میں کمپنی کی انجینئرنگ کی صلاحیتوں کو بڑھانے کے لیے استعمال کیا جائے گا۔