Southern People's Resistance militants loyal to Yemen's President Abd-Rabbu Mansour Hadi take positions on the frontline of fighting against Houthi fighters
سلامتی کونسل حوثی مخالف جنگ میں مدد کرے: یمنی صدر
یمن کے صدر عبد ربہ منصور ہادی نے اقوام متحدہ کی سلامتی کونسل سے مطالبہ کیا ہے کہ وہ ان کی حکومت کی حمایت میں اور حوثی باغیوں کی جارحیت ختم کرانے کے لئے فوجی مداخلت کی اجازت دے۔
صدر منصور ہادی نے کونسل کوبھیجے گئے خط میں کہا ہے کہ انھوں نے خلیج تعاون کونسل کے رکن ممالک اور عرب لیگ سے بھی مطالبہ کیا ہے کہ تمام ذرائع استعمال کرتے ہوئے حوثی جارحیت کے خلاف یمن اور اس کے شہریوں کا دفاع کریں۔
انھوں نے سیکیورٹی کونسل سے مطالبہ کیا کہ وہ اقوام متحدہ کے چارٹر کے باب 7 کے تحت ایک قرار داد منظور کرے جس کے ذریعے یمن میں بین الاقوامی فوجی مداخلت کی اجازت دی جائے۔
ان کا کہنا تھا کہ سیکیورٹی کونسل کی قرارداد میں مدد پر آمادہ ممالک کو دعوت دی جائے کہ وہ فوری طور پر یمن کی قانونی حکومت کی مدد کریں تاکہ یمن کی سلامتی اور علاقائی خود مختاری کا تحفظ کیا جائے اور عدن سمیت ملک کے جنوبی شہروں کو حوثی جارحیت سے بچایا جاسکے۔
ہادی کا کہنا تھا کہ فوجی قافلے عدن پر حملہ کرنے کے لئے بڑھ رہے ہیں اور حوثیوں کے قبضے میں موجود یمنی ائیرفورس کے طیارے عدن پر بمباری کررہے ہیں۔
انھوں نے لکھا ہے کہ پر امن معاہدے کی تمام کوششیں حوثیوں کی جانب سے مسترد کردی گئی ہیں اور ان کا مقصد پورے ملک پر قبضہ کرنا ہے۔"یمنی عوام نے اس سے زیادہ بھیانک جارحیت کا سامنا نہیں کیا ہے۔ حوثیوں کی جانب سے درپیش خطرات صرف یمن کی سلامتی کو ہی نشانہ نہیں بنا رہے ہیں بلکہ اس سے خطے اور بین الاقوامی امن اور سلامتی کو بھی خطرات لاحق ہیں۔"