• صفحہ اول
• بين الاقوامى

جیسا کہ دمشق کی عبوری حکومت بین الاقوامی حمایت حاصل کر رہی ہے تو کینیڈا نے بدھ کے روز شام کے خلاف اپنی مالی پابندیوں میں نرمی اور ایک سفیر کی تقرری کے منصوبوں کا اعلان کیا۔

شام کے لیے کینیڈا کے خصوصی ایلچی عمر الغبرا نے کہا: "کینیڈا شامیوں کو ایک جامع ملک قائم کرنے کے لیے قابل بنانے میں بامعنی کردار ادا کر سکتا ہے جو اپنے تمام شہریوں کا احترام کرے۔ ہم شام کو افراتفری اور عدم استحکام کی طرف جانے سے روکنے میں بھی مدد کر سکتے ہیں۔"

کینیڈا کی وزارتِ خارجہ کے ایک بیان میں کہا گیا، "ملک میں بعض بینکوں مثلاً شام کے مرکزی بینک کے ذریعے رقوم بھیجنے کی اجازت دینے کے لیے" پابندیوں میں نرمی کی جائے گی۔

لبنان میں کینیڈا کی سفیر سٹیفنی میکولم اب ہمسایہ ملک شام میں ایک غیر رہائشی سفیر کے طور پر متوازی کردار ادا کریں گی۔

قبل ازیں کئی دیگر عالمی طاقتوں کے ساتھ کینیڈا نے بھی بشار الاسد کی معزول شدہ حکومت کے خلاف سخت پابندیاں عائد کر رکھی تھیں۔

کینیڈا کے بیان میں کہا گیا، "ان پابندیوں کو اسد حکومت کے خلاف ایک ذریعے کے طور پر استعمال کیا گیا تھا اور ان میں نرمی سے امداد کی مستحکم اور پائیدار ترسیل ممکن بنانے، مقامی تعمیرِ نو کی کوششوں اور شام کی تیزی سے بحالی میں مدد ملے گی۔"

کئی دارالحکومتوں نے اسد کے زوال کا خیر مقدم کیا تھا لیکن فاتح باغیوں کا صرف محتاط استقبال کیا۔

شارع کے ھیئۃ تحریر الشام (ایچ ٹی ایس) اسلامی گروپ کی جڑیں القاعدہ کی شامی شاخ میں ہیں۔

نئی حکومت نے شام کی مذہبی اور نسلی اقلیتوں کے تحفظ کے عزم کا اظہار کیا ہے لیکن حالیہ دنوں میں سکیورٹی فورسز نے مبینہ طور پر سینکڑوں علوی شہریوں کو ہلاک کر دیا ہے۔

پابندیوں میں نرمی کا اعلان کرتے ہوئے کینیڈا کی وزیر خارجہ میلانیا جوئے اور شامی وزیر برائے بین الاقوامی ترقی احمد حسین نے ہلاکتوں پر تشویش کا اظہار کیا۔

انہوں نے کہا، "ہم ان مظالم کی بھرپور مذمت اور عبوری حکام سے مطالبہ کرتے ہیں کہ وہ تشدد کے خاتمے کے لیے تمام ضروری اقدامات کریں۔ شہریوں کا تحفظ کیا جائے، تمام مذہبی اور نسلی گروہوں کے وقار اور انسانی حقوق برقرار رکھے جائیں اور مجرموں سے جواب طلبی کی جائے۔"