• صفحہ اول
• بين الاقوامى

شام کی وزارت داخلہ کے ایک ذریعے نے ہفتے کے روز سویداء صوبے میں جنگ بندی کے معاہدے کی اہم شقوں کا انکشاف کیا ہے۔ یہ وضاحت سکیورٹی کشیدگی کو کم کرنے کی بھرپور کوششوں کے بعد سامنے آئی ہے۔

اندرونی سکیورٹی افواج کی تعیناتی

العربیہ کو ذرائع نے بتایا کہ معاہدے میں مغربی اور شمالی سویداء کے دیہی علاقوں میں اندرونی سکیورٹی افواج کو جھڑپیں روکنے والی افواج کے طور پر تعینات کرنے کا بندوبست شامل ہے۔ شامی سکیورٹی افواج کو صرف مرکزی سڑکوں پر تعینات کیا جائے گا شہروں کے اندر نہیں۔ اس کا مقصد حالات کو پرسکون کرنا اور استحکام کو مضبوط کرنا ہے۔ ذرائع نے بتایا کہ معاہدے میں اس کی شقوں کو 48 گھنٹوں کے اندر نافذ کرنے کا بھی بندوبست شامل کیا گیا ہے۔ اس میں درعا اور سویداء کے درمیان انسانی ہمدردی کی راہداریوں کو کھولنا شامل کیا گیا ہے تاکہ شہریوں اور زخمیوں کے انخلا کو یقینی بنایا جا سکے۔

زیر حراست افراد کا تحفظ

ذرائع نے یہ بھی بتایا کہ معاہدے میں غیر قانونی گروہوں کے پاس بدو قبائل کے زیر حراست افراد کے تحفظ سے متعلق ایک شق شامل کی گئی ہے جس میں زور دیا گیا ہے کہ یہ قدم فریقین کے درمیان اعتماد پیدا کرنے اور مستقبل میں کسی بھی کشیدگی سے بچنے کے لیے ضروری ہے۔ یاد رہے شامی ایوان صدر نے ہفتے کو فوری اور مکمل جنگ بندی کا اعلان کیا تھا جس کے چند گھنٹوں بعد شام کے لیے امریکی ایلچی تھامس باراک نے اعلان کیا کہ اسرائیل اور شام نے دروز اکثریت والے علاقے میں جھڑپوں کے بعد جنگ بندی پر اتفاق کیا ہے۔

شامی ایوان صدر نے اپنے بیان میں جنگ بندی کی کسی بھی خلاف ورزی کے خلاف خبردار کیا اور زور دیا کہ یہ خودمختاری کی خلاف ورزی ہوگی۔ اس سے قبل، شامی سکیورٹی افواج نے سویداء صوبے میں شہریوں کے تحفظ اور افراتفری کو روکنے کے لیے تعیناتی شروع کر دی تھی۔