• صفحہ اول
• بين الاقوامى

امریکی ایلچی ٹام براک نے منگل کے روز اسرائیلی دروز کے روحانی پیشوا شیخ موفق طریف سے ملاقات کی۔ اس دوران انہوں نے شام کے صوبہ السویدا کی صورتِ حال پر تبادلۂ خیال کیا جہاں حالیہ مسلح جھڑپوں میں سینکڑوں افراد ہلاک ہو گئے تھے اور ملک کے جنوب میں عدم استحکام پر تشویش میں اضافہ ہوا۔

براک نے ایکس پر ایک پوسٹ میں کہا، "آج میں نے اسرائیلی دروز کے روحانی پیشوا شیخ موفق طریف اور ان کی ٹیم سے ایک پُرجوش اور معلوماتی ملاقات کی۔ ہم نے السویدا کی صورتِ حال اور تمام فریقوں کے مفادات کو یکجا کرنے، تناؤ میں کمی اور افہام و تفہیم پیدا کرنے کے طریقوں پر تبادلۂ خیال کیا۔"

صوبہ السویدا جنوبی شام میں دروز فرقے کا اکثریتی علاقہ ہے جہاں معاشی تباہی، بدعنوانی اور مقامی لوگوں کی مسلح گروہوں سے جھڑپوں پر گہری مایوسی کے باعث حالیہ مہینوں میں تشدد کے غیر معمولی لیکن مہلک واقعات دیکھنے میں آئے ہیں۔