• صفحہ اول
• بين الاقوامى

غزہ جانے والے امدادی بحری جہاز کو روکنے کے چار دن بعد اس کی آسٹریلوی کپتان کو اسرائیلی جیل سے منتقل کر دیا گیا ہے۔

دی گارڈین کی خبر کے مطابق کپتان میڈلین حبیب کو اتوار کی صبح بحری قافلے کے دیگر کارکنان کے ہمراہ اردن کی سرحد پر لے جایا گیا۔

بحری جہاز کانشس کی کپتان حبیب کو بدھ کے روز 140 سے زائد کارکنان کے ساتھ اس وقت حراست میں لیا گیا جب ان کے نو جہازوں کو اسرائیلی فوج نے روک لیا تھا۔

فریڈم فلوٹیلا کولیشن اور تھاؤزینڈ میڈلینز نامی جہاز غزہ جا رہے تھے۔

تسمانیہ سے تعلق رکھنے والی حبیب کو دیگر کارکنان کے ہمراہ صحرائے نقب میں اسرائیل کی انتہائی سکیورٹی والی کیٹزیوٹ جیل لے جایا گیا۔

اطلاعات کے مطابق انہوں نے استثناء کی دستاویز پر دستخط کرنے سے انکار کر دیا تھا جس میں انہیں یہ تسلیم کرنا تھا کہ انہوں نے اسرائیل کی بحری ناکہ بندی کو غیر قانونی طور پر توڑنے کی کوشش کی تھی۔

آسٹریلوی قونصلر کے اہلکاروں نے ملاقات میں انہیں بتایا کہ جب تک وہ دستاویز پر دستخط نہیں کرتیں وہ اسرائیل میں "غیر معینہ مدت تک" رہیں گی۔

حبیب نے پہلے آسٹریلوی حکام کو بتایا تھا کہ انہیں تحویل میں "ذلت آمیز سلوک کا سامنا کرنا پڑا لیکن کوئی جسمانی زیادتی" نہیں ہوئی۔

آسٹریلیا کے خارجہ امور و تجارت کے ایک محکمے نے کہا کہ اس نے اسرائیل میں زیرِ حراست آسٹریلوی شہریوں کے ساتھ سلوک کا معاملہ اسرائیلی حکام کے سامنے اٹھایا ہے۔

ایک ترجمان نے کہا: "کچھ عرصے سے ہم نے بحری ناکہ بندی کی خلاف ورزی کی کوششوں سے خبردار کیا ہے اور آسٹریلوی باشندوں کو سختی سے مشورہ دیا ہے کہ وہ اپنی حفاظت کو لاحق خطرات کے پیشِ نظر ایسا نہ کریں۔ ہم اسرائیل سے یہ مطالبہ دہراتے ہیں کہ وہ غزہ میں انسانی امداد کی مسلسل، بلا تعطل فراہمی ممکن بنائے۔"

حبیب کا جہاز کانشس اکتوبر کے اوائل میں 100 رضاکاروں اور غزہ کے لیے امدادی سامان لے کر اٹلی سے روانہ ہوا تھا۔