فرانس کے صدر ایمانوئل ماکروں
فرانس کے صدر ایمانوئل ماکروں نے متحدہ عرب امارات کے خلاف ایرانی حملوں کی مذمت کرتے ہوئے انہیں "ناقابل قبول" قرار دیا ہے۔ یہ مذمت مشرق وسطیٰ کی جنگ میں فائر بندی کے نفاذ کے بعد پہلی بار امارات پر ہونے والے میزائل اور ڈرون حملوں کے بعد سامنے آئی ہے۔
ماکروں نے منگل کے روز "ایکس" پلیٹ فارم پر جاری ایک بیان میں کہا کہ متحدہ عرب امارات کے شہری انفراسٹرکچر کے خلاف پیر کے روز کیے گئے ایرانی حملے بلا جواز اور ناقابل قبول ہیں۔ انہوں نے اپنے علاقے کے دفاع کے لیے امارات اور خطے کے اتحادی ممالک کے لیے فرانس کی حمایت کا اعادہ کیا اور آبنائے ہرمز کو دوبارہ کھولنے کا اپنا مطالبہ بھی دہرایا۔
اسی تناظر میں برطانوی وزیر اعظم کیئر اسٹامر نے پیر کے روز مشرق وسطیٰ میں کشیدگی کم کرنے کی اپیل کی۔ انھوں نے ایک بیان میں کہا کہ برطانیہ ... متحدہ عرب امارات کو نشانہ بنانے والے میزائل اور ڈرون حملوں کی مذمت کرتا ہے۔
اسٹامر نے مزید کہا کہ اس کشیدگی کو روکنا چاہیے۔ ایران کو مشرق وسطیٰ میں جنگ بندی کے تسلسل کو یقینی بنانے اور ایک طویل مدتی سفارتی حل تک پہنچنے کے لیے سنجیدگی سے مذاکرات میں شامل ہونا چاہیے۔
متحدہ عرب امارات نے پیر کے روز اعلان کیا تھا کہ اس نے ایران کی جانب سے کیے گئے میزائل اور ڈرون حملوں کا مقابلہ کیا ہے۔ اماراتی حکام کے مطابق فجیرہ پیٹرولیم انڈسٹریز کے علاقے کو نشانہ بنائے جانے سے آگ بھڑک اٹھی اور تین افراد زخمی ہوئے۔