• صفحہ اول
• بين الاقوامى

امریکی شہر آرکاڈیا کی سابق خاتون میئر، ایلین وانگ نے چین کے لیے ایک غیر قانونی غیر ملکی ایجنٹ کے طور پر کام کرنے کا اعتراف کر لیا ہے۔ یہ اعترافِ جرم وفاقی حکام کے ساتھ ہونے والے ایک معاہدے کے تحت سامنے آیا، جس کے فوری بعد انہوں نے اپنے مقامی عہدے سے استعفا دے دیا۔

پیر کے روز سامنے آنے والی وفاقی عدالتی دستاویزات کے مطابق، وانگ نے اعتراف کیا کہ انہوں نے 2020 اور 2022 کے درمیان عوامی جمہوریہ چین کی حکومت کے ساتھ تعاون کیا تاکہ امریکہ کے اندر ایک جعلی نیوز ویب سائٹ کے ذریعے سیاسی پروپیگنڈا پھیلا کر امریکی رائے عامہ، خاص طور پر چینی نژاد امریکی کمیونٹیز کو متاثر کیا جا سکے۔

تحقیقات سے معلوم ہوا ہے کہ 58 سالہ وانگ نے اپنے سابق منگیتر یاؤننگ مائیک سن کے ساتھ مل کر "U.S. News Center" کے نام سے ایک ویب سائٹ چلائی، جس نے خود کو ایک آزاد News Source کے طور پر پیش کیا، جبکہ درحقیقت وہ چینی حکام کی براہ راست ہدایات پر عمل درآمد کر رہی تھی۔

اعترافِ جرم کے معاہدے کے مطابق اس جوڑی نے چینی سرکاری اداروں کے تیار کردہ پروپیگنڈا مواد کو شائع کیا اور باقاعدگی سے ایسی رپورٹس اور اسکرین شاٹس بھیجے جن میں ہر شائع شدہ مواد پر قارئین کی تعداد اور رد عمل کی تفصیلات موجود ہوتی تھیں۔ ایک واقعے میں وانگ سے سنکیانگ کے علاقے میں انسانی حقوق کی خلاف ورزیوں کی تردید پر مبنی مضمون شائع کرنے کو کہا گیا۔ اس میں یہ دعویٰ کیا گیا تھا کہ وہاں کوئی نسل کشی یا کپاس کی پیداوار میں جبری مشقت نہیں ہو رہی۔ یہ متن ایک چینی سرکاری اہل کار نے تیار کیا تھا، جس نے کام کی تیزی پر وانگ کی تعریف بھی کی۔

وانگ نومبر 2022 میں ریاست کیلیفورنیا کے ضلع لوس اینجلس میں واقع شہر آرکاڈیا کی سٹی کونسل کی رکن منتخب ہوئی تھیں، جہاں میئر کا عہدہ کونسل کے اراکین کے درمیان باری باری تبدیل ہوتا ہے۔

وفاقی الزامات تسلیم کرنے کے بعد وانگ کو 10 سال تک قید کی سزا ہو سکتی ہے۔ لوس اینجلس کے اعلیٰ وفاقی پراسیکیوٹر بل ایسایلی نے کہا کہ یہ کیس امریکی اداروں کے اندر اپنا اثر و رسوخ بڑھانے کی بیجنگ کی کوششوں کی ایک نئی مثال ہے۔ انہوں نے خبردار کیا کہ اصل تشویش ایک غیر ملکی ایجنٹ کی اعلیٰ مقامی منتخب عہدوں تک رسائی ہے۔

وانگ کے سابق ساتھی 'سن' کو 2024 میں سازش اور غیر ملکی ایجنٹ کے طور پر کام کرنے کے الزامات میں مجرم قرار دیا گیا تھا اور گذشتہ فروری میں انہیں چار سال قید کی سزا سنائی گئی تھی۔ استغاثہ نے اشارہ دیا کہ چینی حکام نے وانگ کو سیاسی طور پر آگے بڑھانے کی کوشش کی تاکہ وہ کیلیفورنیا میں چینی مفادات کے تحفظ کے لیے اعلیٰ عہدوں تک پہنچ سکیں۔

یہ کیس امریکہ میں ان وسیع تحقیقات کا حصہ ہے جو میڈیا، سیاست اور انٹیلی جنس کے ذریعے امریکی پالیسیوں پر چین کے اثر انداز ہونے کی کوششوں کے حوالے سے کی جا رہی ہیں۔ امریکی انسدادِ جاسوسی کے اداروں نے 2022 سے بیجنگ کے بڑھتے ہوئے علانیہ اور خفیہ اثر و رسوخ کے طریقوں کے خلاف انتباہ جاری کر رکھا ہے۔