• صفحہ اول
• بين الاقوامى

ارجنٹائن کے کپتان اور فٹبال کے عظیم کھلاڑی لیونل میسی نے 2026 ورلڈ کپ کے سیمی فائنل میں پہنچنے کے بعد جشن کے دوران ایسے انداز اپنائے جس پر انگلش شائقین غصے میں آگئے۔

ارجنٹائن نے سوئٹزرلینڈ کو اضافی وقت کے بعد 3-1 سے شکست دے کر 2026 فیفا ورلڈ کپ کے سیمی فائنل میں جگہ بنا لی۔

یہ ٹورنامنٹ امریکہ، میکسیکو اور کینیڈا میں جاری ہے۔میچ کے اختتام پر کھلاڑیوں نے میدان کے وسط میں ایک دوسرے کو گلے لگایا، پھر اپنی ٹیم کے حامیوں کے پاس گئے تاکہ ان کے ساتھ کامیابی کی خوشی منائیں۔

نیلے اور سفید لباس میں موجود ارجنٹائنی مداحوں نے پورے 120 منٹ تک ٹیم کا بھرپور ساتھ دیا تھا اور کھلاڑی ''کینساس اسٹیڈیم'' میں اپنی آواز بلند کرنے والے مداحوں کا شکریہ ادا کرنا چاہتے تھے۔جشن کے دوران مختلف نعروں کے بیچ اچانک شائقین نے نعرہ لگانا شروع کیا: ''جو نہیں کودتا، وہ انگلش ہے'''۔

اس پر ارجنٹائن کے تمام کھلاڑی مداحوں کے ساتھ شامل ہوگئے اور انگلینڈ کے خلاف نعرے لگانے لگے۔لیونل میسی بھی اس موقع پر پیچھے نہ رہے۔

انہوں نے اپنی شرٹ اتار دی، اسے دائیں ہاتھ میں پکڑا اور ایسے لہرانے لگے جیسے وہ بھی عام شائقین کی طرح جشن منا رہے ہوں۔

واضح رہے کہ 1978، 1986 اور 2022 کا ورلڈ کپ جیتنے والی ارجنٹائن کی ٹیم اب سیمی فائنل میں انگلینڈ سے مقابلہ کرے گی، جس نے ناروے کو اضافی وقت کے بعد 2-1 سے شکست دے کر آخری چار میں جگہ بنائی ہے۔