• صفحہ اول
• مشرق وسطی

یمن کے صدر عبد ربہ منصور ھادی نے گذشتہ روز جدہ میں السلام شاہی محل میں سعودی فرمانروا شاہ سلمان بن عبدالعزیز سے ملاقات کی۔

سعودی پریس ایجنسی’واس‘ کے مطابق دونوں رہ نماؤں کے درمیان ہونے والی ملاقات میں یمن کی موجودہ صورت حال کا جائزہ لیا گیا۔ اس موقع پر شاہ سلمان نے کہا کہ سعودی عرب یمن میں آئینی حکومت کی رٹ بحال کرنے کے لیے اپنے مشن کو پایہ تکمیل تک پہنچائے گا۔

شاہ سلمان نے یمنی صدر کو یقین دلایا کہ سعودی عرب یمن میں قیام امن، استحکام اور آئینی حکومت کی بحالی کے لیے جو بھی ضروری ہوا وہ کرے گا۔

اس موقع پر یمنی صدر نے خادم الحرمین الشریفین اور ان کی حکومت کی طرف سے یمنی باغیوں کے خلاف جاری آپریشن اور یمنی عوام کی ہرممکن امداد پران کا خصوصی شکریہ ادا کیا۔

یمنی صدر اور شاہ سلمان کے درمیان ہونے والی بات چیت میں یمن اور دیگر علاقائی اور عالمی امور پربھی بات چیت کی گئی۔

ملاقات میں سعودی وزیر مملکت ڈاکٹر مساعد بن محمد العیبام سعودی انٹیلی جنس چیف خالد بن علی الحمیدان اور یمنی صدر کے اسٹاف افسر ڈاکٹر عبداللہ العلیمی بھی موجود تھے۔