• صفحہ اول
• مشرق وسطی

اسرائیل کے عبرانی ذرائع ابلاغ نے انکشاف کیا ہے کہ قطر کے فلسطین کے لیے خصوصی ایلچی محمد العمادی نے قبرص میں اسرائیلی وزیر دفاع آوی گیڈور لائبرمین سے ایک خفیہ ملاقات کی ہے جس میں فلسطین کے محصور علاقے غزہ کی پٹی میں ’حماس‘ کے ساتھ جنگ بندی کےامور پر بات چیت کی گئی۔

اسرائیل سے عبرانی میں نشر ہونے والےٹی وی چینل 10 کے مطابق غزہ میں جنگ بندی کے حوالے سے قطری مندوب اور لائبرمین کے درمیان خفیہ ملاقات 22 جولائی کو ہوئی تھی۔ اس ملاقات میں غزہ کی پٹی میں جنگ بندی بالخصوص دوحہ کی طرف سے غزہ کے لیے مالی امداد پر بات چیت کی گئی۔

ٹی وی چینل کی رپورٹ کے مطابق آوی گیڈور لائبرمین سرکاری دورے پر قبرص میں تھے جہاں قطری مندوب نے ان سے ملاقات کی۔

رپورٹ کے مطابق قطری مندوب نے اسرائیلی وزیر دفاع سے ملاقات میں غزہ کی پٹی میں انسانی بحران ختم کرنے کے لیے مختلف تجاویز پیش کیں۔ اس کے علاوہ غزہ میں جنگی قیدی بنائےگئے اسرائیلی فوجیوں کی رہائی کے حوالےسے بھی تبادلہ خیال کیا گیا۔

ٹی وی رپورٹ میں کہا ہے کہ اسرائیل نے قطر کی ثالثی سے حماس کے ساتھ جنگ بندی معاہدے کی تجویز مسترد کردی تھی اور اس سلسلے میں مصر کو زیادہ قابل اعتبار قراردیا تھا۔