• صفحہ اول
• مشرق وسطی

امریکہ نے ایران اور اسرائیل کے درمیان جون میں پیش آنے والے حالیہ تصادم کے دوران اپنے "تھاڈ" میزائل سسٹم کا تقریباً 25 فیصد ذخیرہ استعمال کر لیا۔ یہ انکشاف اس کارروائی سے باخبر ذرائع نے کیاہے۔

امریکی افواج نے ایران کی جانب سے داغے گئے میزائلوں کو روکنے کے لیے "تھاڈ" کے 100 سے زائد میزائل فائر کیے، جن کی تعداد بعض اطلاعات کے مطابق 150 تک پہنچ سکتی ہے۔ یہ امریکہ کے اس جدید دفاعی نظام کے ذخیرے کا بڑا حصہ ہے۔

رپورٹ کے مطابق امریکہ کے پاس کل سات "تھاڈ" دفاعی نظام موجود ہیں، جن میں سے دو کو اسرائیل میں دفاعی کارروائیوں کے دوران استعمال کیا گیا۔ یہ معلومات امریکی نشریاتی ادارے "سی این این" نے فراہم کیں۔

ذخیرے میں تشویشناک کمی

میزائلوں کے اس بڑے پیمانے پر استعمال نے امریکی دفاعی نظام کی فوری ردعمل کی صلاحیت کے بارے میں تشویش پیدا کر دی ہے۔ اس سے امریکی ذخیرے میں موجود اس خلاء کا بھی انکشاف ہوا ہے جو ایسے وقت میں سامنے آئی ہے جب اسرائیل کے لیے امریکی عوامی حمایت تاریخ کی کم ترین سطح پر ہے۔

دفاعی امور کے ماہرین اور سابق امریکی حکام کا کہنا ہے کہ اتنی بڑی مقدار میں میزائلوں کا مختصر وقت میں استعمال واشنگٹن کی آئندہ ممکنہ خطرات سے نمٹنے کی تیاری پر سوالات کھڑے کرتا ہے، بالخصوص جب موجودہ رفتار سے اس ذخیرے کی دوبارہ تیاری میں وقت لگ سکتا ہے۔

پیداوار کی سست رفتاری

امریکی محکمہ دفاع کے 2026 کے مجوزہ بجٹ کے مطابق، پچھلے سال صرف 11 "تھاڈ" میزائل تیار کیے گئے تھے، جبکہ رواں سال مزید 12 میزائلوں کی فراہمی متوقع ہے۔

ایک دفاعی اہلکار نے حفاظتی خدشات کے پیش نظر موجودہ ذخیرے کی تفصیلات بتانے سے گریز کیا، تاہم انہوں نے اتنا ضرور کہا کہ وزارت دفاع کسی بھی ممکنہ خطرے کے جواب کے لیے تیار ہے۔

"تھاڈ" سسٹم کیا ہے؟

اخبار "وال اسٹریٹ جرنل" نے پہلی بار یہ رپورٹ دی تھی کہ ایران کے ساتھ 12 روزہ کشیدگی کے دوران امریکہ نے کتنے "تھاڈ" میزائل استعمال کیے۔

اگرچہ اس جدید نظام نے ایرانی میزائل حملے کے خلاف مؤثر دفاع کیا، تاہم کچھ ایرانی میزائل اسرائیل کو نشانہ بنانے میں کامیاب بھی ہوئے۔

"تھاڈ" ایک متحرک دفاعی نظام ہے جو کم فاصلے، درمیانے اور طویل فاصلے تک مار کرنے والے بیلسٹک میزائلوں کو زمین کے اندرونی یا بیرونی فضا میں ان کے آخری مرحلے پر تباہ کرنے کی صلاحیت رکھتا ہے۔

ہر "تھاڈ" بیٹری میں 95 امریکی فوجی تعینات ہوتے ہیں، جنہیں 6 لانچنگ پلیٹ فارمز اور 48 میزائلوں سے لیس کیا جاتا ہے۔ یہ میزائل معروف امریکی کمپنی "لوکہیڈ مارٹن" تیار کرتی ہے، اور ہر ایک میزائل کی لاگت تقریباً 1 کروڑ 27 لاکھ ڈالر بتائی گئی ہے۔