• صفحہ اول
• مشرق وسطی

حماس کے ایک ذمہ دار ذریعہ نے "العربیہ" کو اس بات کی تصدیق کی ہے کہ غزہ کے معاہدے کے حوالے سے تحریک کو ثالثوں کی طرف سے ابھی تک کوئی نئی پیشکش نہیں ملی ہے۔

یہ وائٹ ہاؤس کے اس اعلان کے بعد ان کا پہلا تبصرہ ہے کہ غزہ کے بارے میں معاہدہ بہت قریب ہے۔ اس ذریعہ نے اس بات کی طرف بھی اشارہ کیا کہ حماس نے اب تک مصری وفد سے ملاقات نہیں کی ہے تاکہ نئی پیشکش یا جسے امریکی صدر ڈونلڈ ٹرمپ کا نیا منصوبہ کہا جا رہا ہے اس پر بات چیت کی جا سکے۔

اس سے قبل وائٹ ہاؤس نے تصدیق کی تھی کہ غزہ کے بارے میں معاہدہ بہت قریب ہے۔ وائٹ ہاؤس کی ترجمان کیرولین لیویٹ نے "فاکس نیوز" سے بات چیت میں تصدیق کی کہ صدر ٹرمپ اس معاملے پر قطری ثالثوں سے بات کریں گے۔

انہوں نے کہا کہ صدر آج وائٹ ہاؤس میں اسرائیلی وزیر اعظم بنیامین نیتن یاہو کے ساتھ 21 نکات پر مشتمل امن منصوبے پر تبادلہ خیال کریں گے۔ ٹرمپ نے اسرائیلی وزیر اعظم کا استقبال کیا اور پھر ملاقات کے بعد نیتن یاہو کے ساتھ پریس کانفرنس کرتے ہوئے 21 نکاتی جنگ بندی کا اپنا منصوبہ پیش کردیا ہے۔ قبل ازیں ٹرمپ نے اپنے سوشل نیٹ ورک ٹروتھ سوشل پر ایک پوسٹ میں لکھا تھا کہ ہمارے پاس مشرق وسطیٰ میں کچھ عظیم حاصل کرنے کا ایک حقیقی موقع ہے۔ انہوں نے مزید کہا کہ ہر کوئی کسی قابل ذکر چیز کے لیے تیار ہے، یہ ایک مثال ہے اور ہم اسے حاصل کر لیں گے۔