• صفحہ اول
• مشرق وسطی

"العربیہ/ الحدث" کے نمائندے محمود الواوی نے ان ویڈیوز کی تفصیلات کا انکشاف کیا جن میں بشار الاسد الغوطہ میں نظر آ رہے ہیں۔ انہوں نے وضاحت کی کہ یہ ریکارڈنگز صدارتی محل کے اندر ایک ایسے لفافے میں ملی ہیں جس پر "انتہائی خفیہ" لکھا ہوا تھا اور اس میں لونا الشبل سے متعلق ذاتی دستاویزات بھی شامل تھیں۔ انہوں نے مزید کہا کہ بعض افراد کو یہ کلپس 8 دسمبر 2024 کو ملے تاکہ شامیوں کو بشار الاسد کا دوسرا رخ دکھایا جا سکے۔ انہوں نے اشارہ کیا کہ یہ لیکس شامی سڑکوں پر بحث کا موضوع بن گئیں جب ان میں بشار الاسد کو شامیوں کی مشکلات کا مذاق اڑاتے ہوئے آواز اور تصویر کے ساتھ فلما کر پیش کردیا گیا۔

سیاسی تجزیہ کار عبداللہ الحمد نے کہا کہ الغوطہ کی لیکس کمال حسن اور رامی مخلوف کے لیے روسی حمایت کی بات کے صرف 24 گھنٹے بعد سامنے آئیں جس کا مقصد شامی ساحل میں کشیدگی پیدا کرنا تھا۔ انہوں نے کہا کہ الغوطہ میں بشار الاسد کی ویڈیوز کا لیک ہونا ان کے ارد گرد کے محدود حلقے میں اندرونی کشمکش کی موجودگی کا اشارہ ہے۔

تند رویے اور مذاق

" العربیہ/ الحدث" کو موصول ہونے والے ویڈیو مواد کے مطابق ان ریکارڈنگز میں بشار الاسد اپنی سابق مشیر لونا الشبل کے ساتھ نظر آتے ہیں اور ان میں نجی گفتگو شامل ہے جو شام کے اندرونی حلقوں اور شخصیات کے بارے میں تند رویے اور مذاق کو ظاہر کرتی ہے۔ ایک کلپ میں بشار الاسد کو الغوطہ سے متعلق گالیاں دیتے ہوئے دیکھا گیا۔ انہوں نے کہا ’’ لعنت ہو ابو الغوطہ پر‘‘ ۔ لونا الشبل ایک اور کلپ میں حزب اللہ کی اپنی صلاحیتوں پر فخر کرنے کے بارے میں بات کر رہی ہیں۔ اس کے بعد انہوں نے مزید کہا ’’ اور اب ہمیں ان کی کوئی آواز نہیں سنائی دیتی‘‘

بشار الاسد نے الغوطہ سے اپنی ٹیم سے بات کرتے ہوئے یہ بھی کہا کہ "ہم سقبا میں داخل ہوں گے‘‘ ۔ گویا انہیں علم نہیں تھا کہ یہ علاقہ آزاد ہو چکا ہے۔ ریکارڈنگز میں سابقہ ملاقاتوں کے دوران ہاتھ چومنے والے شامی فوجیوں کا مذاق بھی الاسد اور لونا الشبل اڑاتے ہیں۔ ساتھ ہی ایک کلپ میں لونا الشبل ان سے پوچھتی ہیں کہ سڑکوں پر اپنی تصاویر دیکھ کر انہیں کیسا محسوس ہوتا ہے جس پر وہ جواب دیتے ہیں کہ انہیں کچھ محسوس نہیں ہوتا۔ ان کلپس میں شامی پولیس اور وزیر داخلہ کا مذاق بھی اڑایا گیا۔ شام میں اندرونی صورتحال کے بارے میں بات کرتے ہوئے بشار الاسد کو یہ کہتے ہوئے نقل کیا گیا کہ "مجھے صرف شرمندگی ہی نہیں بلکہ گھن آتی ہے۔"