• صفحہ اول
• مشرق وسطی

قطر کے دارالحکومت دوحہ کے علاقے الدفنہ میں واقع ایک ریستوران میں شدید لڑائی جھگڑا ہوا ہے۔

گذشتہ چند گھنٹوں کے دوران کچھ وڈیوز وائرل ہوئی ہیں جن میں بعض لوگوں کے بیچ کرسیوں سے لڑائی اور مار پیٹ دیکھی جا سکتی ہے۔ اس دوران ریستوران میں افراتفری کا منظر تھا، تاہم لڑائی کی وجوہات معلوم نہیں ہو سکیں۔

قطری وزارت داخلہ نے ایک بیان میں واضح کیا ہے کہ اس نے عرب قومیتوں کے 25 افراد کو گرفتار کر لیا ہے۔

وزارت نے آج بدھ کو "ایکس" پلیٹ فارم پر اپنے اکاؤنٹ کے ذریعے ایک بیان میں کہا کہ سوشل میڈیا پر الدفنہ کے علاقے میں ایک ریستوران میں چند افراد کے درمیان جھگڑے اور اس کے ساتھ قانون کے منافی رویوں کے بارے میں جو کچھ گردش کر رہا ہے، اس نے افراد کی حفاظت اور املاک کو نقصان پہنچایا اور امن و عامہ میں خلل ڈالا۔ مزید یہ کہ متعلقہ حکام نے اس واقعے کے حوالے سے ضروری کارروائی شروع کر دی ہے اور عرب قومیت کے 25 افراد کو گرفتار کر لیا گیا ہے۔

وزارت نے یہ بھی واضح کیا کہ گرفتار افراد کے خلاف ضروری کارروائی مکمل کر لی گئی ہے تاکہ انہیں پبلک پراسیکیوشن کے حوالے کیا جا سکے۔

اس موقع پر تمام شہریوں اور رہائشیوں سے قوانین اور ضوابط کی پاسداری، ذمہ داری کا مظاہرہ کرنے اور ایسے کسی بھی رویے سے دور رہنے کی اپیل کی گئی ہے جس سے امن و عامہ میں خلل پڑے۔

وزارت نے اپنی بات مکمل کرتے ہوئے اس بات پر زور دیا کہ وہ ہر اس شخص کے خلاف ضروری کارروائی کرنے میں کوئی تساہل نہیں برتے گی جو قانون کی خلاف ورزی کرنے یا معاشرے کے امن و امان کو متاثر کرنے والی کسی بھی کارروائی کا مرتکب پایا جائے گا۔