• صفحہ اول
• مشرق وسطی

پاکستان کے نائب وزیرِ اعظم اسحاق ڈار نے اتوار کے روز سابق قطری امیر شیخ حمد بن خلیفہ آلِ ثانی کے انتقال پر تعزیت کا اظہار کرتے ہوئے اعتراف کیا کہ انہوں نے خلیجی ملک کی ترقی اور اسلام آباد سے تعلقات مضبوط بنانے میں اہم کردار ادا کیا۔ ان کی عمر 74 سال تھی۔

قطر کے اعلیٰ سرکاری ادارے نے اتوار کو بتایا کہ سابق قطری امیر شیخ حمد جو 18 سال تک امیر رہنے کے بعد جون 2013 میں سبکدوش ہوئے، قطر کے عزائم کے معمار تھے جنہوں نے اسے ایک نسل سے بھی کم عرصے میں ایک بین الاقوامی اہمیت کے حامل مقام میں تبدیل کر دیا۔

شیخ حمد قطر کی ایک جدید ریاست میں تیزی سے تبدیلی کی نگرانی کے ذمہ دار تھے۔ انہوں نے قطر ایئرویز کو ایک بڑی بین الاقوامی کمپنی کی صورت میں توسیع دی جس نے ہمسایہ ملک کے مسافر بردار ایمریٹس کا مقابلہ کرنے کی کوشش کی۔

قطر کے دارالحکومت دوحہ میں ملک کا بین الاقوامی ایئرپورٹ جس کی تعمیر پر کم از کم 15 بلین ڈالر لاگت آئی، بھی ان کے نام سے منسوب ہے۔

اسحاق ڈار نے ایکس پر لکھا، "قطر کی ریاست کے سابق امیر عزت مآب شیخ حمد بن خلیفہ آلِ ثانی کے انتقال کے بارے میں جان کر بہت صدمہ ہوا۔"

نیز کہا، "اپنے دورِ حکومت میں انہوں نے قطر کی جدید ترقی اور پاکستان کے ساتھ دوستی کا رشتہ مضبوط بنانے میں اہم کردار ادا کیا اور ان کی دور اندیش قیادت اور علاقائی امن کے لیے ان کی خدمات کو تا دیر یاد رکھا جائے گا۔"

انہوں نے شیخ حمد کے انتقال پر آلِ ثانی خاندان، امیرِ قطر، حکومت اور عوام سے تعزیت کا اظہار کیا۔

شیخ حمد کو قطر کو ایک علاقائی ثالث بنانے کا سہرا بھی دیا گیا۔

حالیہ دنوں میں قطر نے پاک-افغان تنازعے، امریکہ-ایران جنگ اور غزہ پر اسرائیل کی جنگ کے دوران سفارتی کوششوں کے ذریعے قیامِ امن میں اہم کردار ادا کیا ہے۔