• صفحہ اول
• پاكستان

پاکستان کی حج سے متعلق وزارت نے بتایا ہے کہ عازمین حج کے لیے پروازوں کے شروع ہونے کے پہلے دو دنوں میں مجموعی طور پر 5611 عازمین حج مدینہ منورہ پہنچ گئے ہیں۔ یہ بات وزارت کی طرف سے پیر کے روز کہی گئی ہے۔

وزارت حج و مذہبی امور کے حکام نے عازمین حج کے لیے سعودی حکومت کی طرف سے کیے جانے والے تعاون کو بھی سراہا ہے۔

پاکستان کی طرف سے حج آپریشن کے سلسلے میں پروازوں کا آغاز ہفتے کے روز کیا گیا ہے۔ پہلی پرواز مکہ روٹ انیشٹو کے حوالے سے لاہور روانہ ہوئی۔ مکہ انیشیٹو کے تحت عازمین حج کی امیگریشن کے سارے امور پاکستان میں ہی مکمل کر لیے جاتے ہیں۔

مکہ انیشیٹو کے تحت لاہور سے پروازوں کا آغاز اسی سال کیا گیا ہے۔ اس سے قبل یہ سہولت اسلام آباد اور کراچی سے دی جارہی تھیں۔ وزارت مذہبی امور کے ترجمان محمد عمر بٹ نے کہا اب تک 23 پروازیں مختلف شہروں سے روانہ ہو چکی ہیں۔

وزارت مذہبی امور کے ترجمان کے مطابق اتوار کے روز سہ پہر تک 1357 عازمین حج مدینہ منورہ پہنچے تھے۔ جبکہ پیر کی رات تک یہ تعداد 5611 ہو گئی۔ ترجمان نے اس موقع پر سعودی حکومت کی طرف سے بہترین انتظامات اور عازمین حج کے لیے فراہم کردہ سہولتوں کی تعریف کی۔

ترجمان نے سعودی عرب کی طرف سے پاکستانی عازمین حج کو فوری طور پر جاری کیے جانے والے نسک کارڈز کی بھی تعریف کی۔ یہ کارڈ عازمین حج کی سعودی عرب میں قیام اور خصوصا مناسک حج کی ادائیگی کے دوران آسان شناخت کا ذریعہ ہوگا۔

علاوہ ازیں سعودی حکومت نے پاکستانی عازمین حج کے لیے اردو زبان میں بھی رہنمائی کے لیے گائیڈ لائنز پیش کی ہیں۔ اسی طرح ڈیجیٹل پروگرامز کی بھی تربیت کا اہتمام کیا گیا تاکہ عازمین حج مختلف 'ایپس' کا استعمال کر سکیں۔

وزارت مذہبی امور کے حکام کے مطابق اسلام آباد، کراچی اور لاہور کے علاوہ فیصل آباد، ملتان اور سیالکوٹ سے پیر کے روز 6 حج پروازیں روانہ ہوئیں۔ پاکستان سے رواں سال حج کے لیے مجموعی طور پر 179210 عازمین فریضہ حج ادا کرنے کے لیے پہنچیں گے۔