• صفحہ اول
• بين الاقوامى

فلسطینی ایلچی نے بتایا کہ فلسطینی اتھارٹی کے صدر محمود عباس روسی صدر ولادیمیر پوتن کے ساتھ غزہ جنگ پر بات چیت کے لیے اگلے ہفتے ماسکو کا دورہ کریں گے۔

روس کی سرکاری خبر رساں ایجنسی ٹاس نے ماسکو میں فلسطینی سفیر کا حوالہ دیتے ہوئے کہا کہ محمود عباس پیر کو روس پہنچیں گے اور منگل کو پوتن سے ملاقات کریں گے۔

محمود عباس حماس کی حریف فلسطینی تحریک الفتح کے سربراہ ہیں۔

سفیر عبدالحفیظ نوفل نے کہا کہ دونوں رہنما غزہ میں سات اکتوبر کے حملوں کے بعد سے ہونے والے واقعات پر تبادلۂ خیال کریں گے۔ "وہ روس کے کردار کے بارے میں بات کریں گے کہ کیا کیا جا سکتا ہے۔"

انہوں نے مزید کہا: "ہم بہت مشکل صورتِ حال سے دوچار ہیں اور روس ایک ایسا ملک ہے جو ہمارے قریب ہے۔ ہمیں ایک دوسرے سے مشورہ کرنے کی ضرورت ہے۔"

ماسکو نے برسوں سے اسرائیل اور فلسطینیوں سمیت شرقِ اوسط کے تمام بڑے ممالک کے ساتھ تعلقات میں توازن پیدا کرنے کی کوشش کی۔

لیکن اسرائیل-حماس جنگ اور یوکرین پر روس کی اپنی جارحیت کے بعد سے پوتن اسرائیل کے دشمنوں یعنی حماس اور ایران کے قریب آگئے ہیں۔

کریملن نے سات اکتوبر کے حملوں پر اسرائیل کے ردِ عمل پر بارہا تنقید کی ہے اور تحمل سے کام لینے کا مطالبہ کیا ہے۔