ایرانی کابینہ میں ردوبدل ،تین وزراء بدعنوانیوں پر برطرف
ایران کے صدر حسن روحانی نے بدعنوانیوں کے الزامات میں تین وزراء کی برطرفی کے بعد تین نئے وزراء کا تقرر کیا ہے۔
ایرانی صدر نے رضا سلطانی کو ثقافت اور اسلامی رہ نمائی ،فخرالدین احمدی اشتیانی کو وزیر تعلیم اور مسعود سلطانی کو کھیلوں اور نوجوانوں کے امور کا وزیر مقرر کیا ہے۔
یہ تینوں وزیر بالترتیب علی جنتی ،علی اصغر فانی اور محمود گودرزی کی جگہ لیں گے۔ان تینوں نے اپنے استعفے پیش کردیے تھے۔کھیلوں اور نوجوانوں کے امور کے سابق وزیر محمود گودرزی کو مالیاتی بدعنوانیوں کے اسکینڈلز منظرعام پر آنے کے بعد عہدہ چھوڑنا پڑا تھا اور ان کی وزارت کے متعدد سینیر عہدے داروں کو گرفتار کر لیا گیا ہے۔
وزیرتعلیم علی اصغر فانی کو بھی اساتذہ کے فنڈ میں خرد برد کے الزامات کے بعد برطرف کردیا گیا تھا۔سابق وزیر ثقافت علی جنتی سخت گیر عالم احمد جنتی کے بیٹے ہیں۔انھیں گذشتہ ماہ قم شہر میں ایک مخلوط کنسرٹ کے انعقاد کی پاداش میں مذہبی حکام کے دباؤ پر برطرف کیا گیا تھا۔اس کنسرٹ میں شریک مردوں اور عورتوں نے اکٹھے رقص کیا تھا۔
