.

مقامات مقدسہ کے درمیان چلنے والی ٹرین کا آپریشن سعودی ریلوے کمپنی کے سپرد

پہلی اشاعت: آخری اپ ڈیٹ:

سعودی عرب میں مقامات مقدسہ کے درمیان چلنے والی تیز رفتار ٹرین کے آپریشن اور دیکھ بھال سے متعلق خدمات سعودی ریلوے کمپنی SAR کے سپرد کیے جانے کی منظوری دے دی گئی۔ ان خدمات میں سیکورٹی اقدامات اور ٹرینوں کے لیے تمام ساز و سامان اور لوازمات کی فراہمی سمیت ہر قسم کی کارروائی شامل ہے۔

اس منظوری کے بعد مقامات مقدسہ کے درمیان چلنے والی ٹرین کے پروگرام اور اس کا تمام تر میزانیہ سعودی ریلوے کمپنی کو منتقل کر دیا جائے گا۔ اس طرح آپریشنز اور دیکھ بھال کے حوالے سے تمام تر اخراجات کی ذمے دار کمپنی ہو گی۔

البتہ اختیارات کی ان سپردگی کے تحت سعودی ریلوے کمپنی اس ٹرین کے آپریشن سے حاصل ہونے والی آمدنی کو خود سے استعمال میں نہیں لا سکے گی۔ کمپنی کو یہ آمدنی ریاست کے خزانے میں جمع کرانا ہو گی۔