بلغراد میں اسرائیلی سفارت خانے کے سامنے حملہ آور ہلاک، اہلکار زخمی: وزیر

سربیا کی وزارتِ داخلہ نے بتایا کہ ہفتے کے روز بلغراد میں اسرائیلی سفارت خانے کی حفاظت پر مامور سربیا کے پولیس افسر کو ایک حملہ آور نےکمان نما ہتھیار سے حملہ کر کے زخمی کر دیا۔

افسر نے جوابی حملے میں حملہ آور پر گولی چلا دی جو مہلک ثابت ہوئی۔

وزیر داخلہ آئیویکا ڈاچچ نے ایک بیان میں کہا کہ حملہ آور نے افسر پر تیر چلایا جو اس کی گردن میں لگا۔ انہوں نے کہا کہ اس کے بعد افسر نے "اپنے دفاع میں ہتھیار کا استعمال کرتے ہوئے حملہ آور کو گولی مار دی جو زخموں کی تاب نہ لاتے ہوئے چل بسا۔"

بیان میں مزید کہا گیا کہ پولیس اہلکار کو جب بلغراد کے اہم ایمرجنسی ہسپتال لے جایا گیا تو وہ ہوش میں تھا۔ وہاں اس کی گردن سے تیر نکالنے کے لیے آپریشن کیا جائے گا۔

اسرائیلی وزارتِ خارجہ کے ترجمان نے کہا، "آج بلغراد میں اسرائیلی سفارت خانے کے قریب دہشت گردانہ حملے کی کوشش کی گئی۔"

ترجمان نے کہا، سفارت خانہ بند ہے اور اس کا کوئی ملازم زخمی نہیں ہوا۔

حملہ آور کی شناخت کا بدستور تعین کیا جا رہا تھا۔ ڈاچچ نے کہا، "حملے کے تمام حالات اور ممکنہ محرکات کی تحقیق کی جا رہی ہے۔"

اسرائیل کا سفارت خانہ بلغراد کے ایک اعلیٰ ترین ضلع میں واقع ہے جو امریکی سفارت خانے سے زیادہ دور نہیں۔

خودکار ہتھیاروں سے لیس افسران کے ساتھ ایلیٹ پولیس یونٹ اس کی حفاظت پر مامور ہوتے ہیں۔

سربیا نے غزہ جنگ کے دوران اسرائیل کے ساتھ قریبی تعلقات برقرار رکھے ہیں۔