شام میں حکومت نواز فورسز اور حکومت مخالف جنگجو گروپوں کےدرمیان جنگ جاری ہے۔
تازہ ترین پیش رفت میں ترک میڈیا نے بتایا ہے کہ شامی اپوزیشن کے مسلح دھڑے حماۃ شہر کے مرکز کی طرف 3 محوروں سے پیش قدمی کی بات کر رہے ہیں۔
دریں اثنا العربیہ/الحدث کی ٹیم نے شمالی حلب کے دیہی علاقوں میں انفنٹری سکول پر مسلح عناصر کے قبضے کے خصوصی مناظر حاصل کیے ہیں۔
شام کی سرکاری ایجنسی نے تصدیق کی ہے کہ فوجی دستے حماۃ کے دیہی علاقوں میں دفاعی اور سپورٹ لائنز کو مضبوط بنانے کے لیے کام کر رہے ہیں تاکہ مسلح دھڑوں کے خلاف جوابی حملہ شروع کیا جا سکے۔
انہوں نے مزید کہا کہ شامی فوج کے یونٹ شمال مغربی حماۃ کے دیہی علاقوں میں واقع قصبے خطب کے شمال اور مغرب میں مسلح دھڑوں کے ساتھ پرتشدد تصادم میں مصروف ہیں۔
اس سے پہلے شام کی عرب خبر رساں ایجنسی نے منگل کے روز کہا تھا کہ دیرالزور گورنری کے شمالی دیہی علاقوں میں سیریئن ڈیموکریٹک فورسز (ایس ڈی ایف) سے وابستہ فورسز کو فوجی یونٹس اور اتحادی افواج کے حملے کا سامنا ہے۔
سیریئن آبزرویٹری فار ہیومن رائٹس نے العربیہ اور الحدث کو بتایا کہ دیر الزور کے مشرق میں حکومتی فورسز اور ’ایس ڈی ایف‘ کے درمیان جھڑپیں جاری ہیں۔ دیر الزور کے مشرق میں 7 دیہاتوں پر ایس ڈی ایف کا اب تک کوئی کنٹرول نہیں ہے۔ سیریئن آبزرویٹری نے مزید کہا کہ ’ایس ڈی ایف‘ دیر الزور کے 7 دیہاتوں سے سرکاری افواج کو ہٹانے کے لیے سخت دباؤ ڈال رہی ہے۔
سیریئن آبزرویٹری نے مزید کہا کہ حکومت کے وفادار قبائلی جنگجو دیر الزور کے مشرق میں ایس ڈی ایف سے لڑ رہے ہیں اور مسلح دھڑے اب حماۃ شہر سے 7 کلومیٹر کے فاصلے پر ہیں۔ انہوں نے العربیہ اور الحدث کو یہ بھی بتایا کہ حلب کے جنوبی اور مشرقی دیہی علاقوں میں پھنسے ہوئے بے گھر شہریوں کی اپیلوں کے بعد 40 روسی گاڑیاں جنگی علاقوں میں تعینات کی گئی ہیں۔
العربیہ اور الحدث کے نامہ نگار نے اطلاع دی ہے کہ شامی ڈیموکریٹک فورسز (ایس ڈی ایف) نے دیر الزور کے مشرقی دیہی علاقوں میں حکومت اور ایرانی حمایت یافتہ ملیشیا سے تعلق رکھنے والے 7 دیہات کا کنٹرول سنبھال لیا۔ ہمارے نمائندے نےبتایا کہ ایران نواز ملیشیا دیر الزور کے مشرقی دیہی علاقوں میں اپنی آخری پوزیشنوں سے پیچھے ہٹ گئے ہیں۔
حماۃ کے دیہی علاقوں میں کئی محاذوں پر جھڑپیں جاری ہیں، جہاں پرتشدد جھڑپوں اور شدید روسی-شامی فضائی حملوں کے درمیان ھیۃ تحریر الشام اور دھڑے آگے بڑھ رہے ہیں۔ ھیۃ تحریر الشام اور دھڑوں نے اعلان کیا کہ ان کے جنگجو صبح سویرے سے ہی طیب الامام، حلفایا اور ماردیس کے قصبوں پر پیش قدمی اور کنٹرول کرنے میں کامیاب ہو گئے ہیں۔
اس سے پہلے روسی وزارت دفاع نے اطلاع دی تھی کہ روس نے شامی فوج کے ساتھ مل کر ادلب، حماۃ اور حلب میں مسلح دھڑوں کے ٹھکانوں پر مشترکہ حملے کیے ہیں۔
