بحری جہاز کے ملبے سے 10 لاکھ ڈالرز مالیت کا خزانہ برآمد

امریکی ریاست فلوریڈا کے اٹلانٹک ساحل کے قریب خاص طور پر "ساحلِ خزانہ" (Treasure Coast) کہلانے والے علاقے میں، غوطہ خوروں کی ایک ٹیم نے ایک عظیم ہسپانوی خزانہ دریافت کیا جس کی مالیت تقریباً دس لاکھ ڈالر بتائی گئی ہے۔

اس خزانے میں ایک ہزار سے زیادہ سونے اور چاندی کے سکے شامل ہیں، جن کے بارے میں خیال ہے کہ وہ ہسپانوی سلطنت کی نوآبادیوں بولیویا، میکسیکو اور پیرو میں اٹھارہویں صدی کے آغاز میں ڈھالے گئے تھے، اس سے پہلے کہ سمندری طوفانوں نے انہیں نگل لیا اور تاریخ نے انہیں مٹی تلے چھپا دیا۔

ایک خزانہ جو تاریخ سناتا ہے

کمپنی Fleet Queens jewels LLC 1715 کے آپریشنز ڈائریکٹر سال گوٹوسو نے کہا کہ یہ دریافت محض مادی خزانہ نہیں، بلکہ انسانی تاریخ کا ایک زندہ باب ہے۔

انہوں نے مزید کہا کہ ہر سکہ اپنے زمانے کےاُن کاریگروں کے ہاتھوں کی ایک چھاپ رکھتا ہے ، جنہوں نے اسے تراشا، اُن ملاحوں کی، جنہوں نے اسے سفر میں اٹھایا اور اُس طوفان کی جس نے اسے دفن کر دیا۔ ایک ہی موقع پر ایک ہزار سکے دریافت کرنا نہایت نایاب اور غیر معمولی واقعہ ہے۔

کچھ سکوں پر واضح تاریخیں اور سرکاری مہر کے نشانات موجود ہیں، جو مؤرخین اور محققین کو ہسپانوی "سنہری دور" کے تجارتی راستوں اور ٹیکس کے نظام کا سراغ لگانے کا نادر موقع فراہم کرتے ہیں۔

قانون جو ماضی کی حفاظت کرتا ہے

گوٹوسو نے مزید بتایا کہ اُن کی ٹیم مکمل طور پر حکام کے ساتھ ہم آہنگی میں کام کرتی ہے، اور ہر موسمِ تلاش کی مکمل دستاویزی ریکارڈنگ کی جاتی ہے، جبکہ دریافت شدہ اشیاء کو عوام کے سامنے پیش کرنے سے قبل قانونی جائزے سے گزارا جاتا ہے۔

فلوریڈا میں آثارِ قدیمہ یا قدیم خزانے کی تلاش کے لیے سخت قوانین نافذ ہیں، جن کے تحت دریافت ہونے والی ہر تاریخی یا "متروکہ" چیز ریاست کی ملکیت سمجھی جاتی ہے۔ ریاست تقریباً 20 فیصد اشیاء اپنے پاس محفوظ رکھتی ہے تاکہ انہیں تحقیق اور عوامی عجائب گھروں میں نمائش کے لیے استعمال کیا جا سکے۔

سمندر کی یادداشت

گوٹوسو نے اپنے کام کو سمندر کی یادداشت میں تحقیق قرار دیتے ہوئے کہا: ہر غوطہ ایک نیا وعدہ لیے ہوتا ہے… کیونکہ سمندر کے سینے میں تین صدیوں سے دفن راز آج بھی موجود ہیں۔

یہ قابلِ ذکر ہے کہ اس غرق شدہ جہاز کی کہانی 31 جولائی 1715 سے جڑی ہے، جب سونے اور جواہرات سے لدا ہوا ایک عظیم ہسپانوی بیڑہ "نئی دنیا" سے اسپین واپس روانہ ہوا تھا۔

مگر فلوریڈا کے ساحل کے قریب ایک خوفناک سمندری طوفان نے ان جہازوں کو آ لیا، جس کے نتیجے میں وہ مکمل طور پر غرق ہو گئے اور ان کے ساتھ ہسپانوی سلطنت کے خزانے بھی سمندر کی تہہ میں جا بسے، جیسا کہ امریکی خبر رساں ادارے "ایسوشی ایٹڈ پریس" نے رپورٹ کیا ہے۔

تب سے لے کر آج تک، ملبورن اور فورٹ پیئرس کے درمیان پھیلا یہ علاقہ ماہی گیروں، غوطہ خوروں اور خزانے کے متلاشیوں کی دلچسپ داستانوں کا مرکز بنا ہوا ہے۔

گزشتہ کئی دہائیوں کے دوران اس غرق شدہ بیڑے کے ملبے سے لاکھوں ڈالر مالیت کے سکے اور زیورات برآمد کیے جا چکے ہیں۔