ترکیہ میں بس ڈرائیور کو اچانک دل کا دورہ... الم ناک حادثے میں درجنوں مسافر ہلاک و زخمی

ترکیہ میں عید الاضحیٰ کی تعطیلات کے دوران ایک معمول کا سفر اس وقت خونی المیے میں بدل گیا جب بس کے ڈرائیور کو سواری چلانے کے دوران اچانک دل کا دورہ پڑا۔ اس کے نتیجے میں ایک ہول ناک حادثہ پیش آیا جس میں ایک بچے سمیت 8 مسافر ہلاک اور 33 زخمی ہو گئے۔

یہ حادثہ مغربی ترکیہ میں اس وقت پیش آیا جب بس ازمیر شہر سے انطالیا جا رہی تھی کہ اچانک راستے سے ہٹ کر سڑک کے کنارے لگے بیریئر سے ٹکرا گئی۔ اس کے فوراً بعد بس میں آگ بھڑک اٹھی اور متعدد مسافر اندر ہی پھنس گئے۔

ترکیہ کے نشریاتی اداروں بشمول این ٹی وی (Ntv) نے اطلاع دی ہے کہ ابتدائی تحقیقات سے پتہ چلا ہے کہ 50 سالہ ڈرائیور مصطفیٰ فوزی مردون ڈرائیونگ کے دوران اچانک دل کا دورہ پڑنے سے جاں بحق ہوا، جس سے یہ قوی امکان ہے کہ تصادم اور آتش زدگی سے قبل ہی وہ گاڑی پر کنٹرول کھو چکا تھا۔

ابتدائی معلومات کے مطابق حادثے سے تقریباً 20 منٹ قبل ڈرائیور نے ایک تکنیکی خرابی کے باعث سڑک کے کنارے گاڑی روکی تھی۔ وہاں اس نے سفر دوبارہ شروع کرنے سے پہلے بس کا معائنہ کیا تھا اور اس وقت اس میں کسی قسم کی تشویش ناک علامات ظاہر نہیں ہو رہی تھیں۔

اس حادثے نے الم ناک مناظر چھوڑے، کیونکہ آگ نے انتہائی تیزی سے بس کو اپنی لپیٹ میں لے لیا، جبکہ مسافروں نے بچنے کی ناکام کوششیں کیں۔ رپورٹوں کے مطابق مرنے والوں میں ایک شیر خوار بچہ، ایک نوجوان دلہن اور ایک طالبہ بھی شامل تھی جو چند دنوں میں اپنی یونیورسٹی سے گریجویشن کرنے والی تھی۔

ترک حکام اس حادثے کی تمام تفصیلات جاننے کے لیے تحقیقات جاری رکھے ہوئے ہیں، جسے ملک میں عید کی تعطیلات کے دوران سب سے خون ریز حادثات میں شمار کیا گیا ہے۔

ازمیر اور انطالیا کو ملانے والی سڑک جہاں یہ حادثہ پیش آیا، سیزن کے دوران مصروف ترین راستوں میں سے ایک سمجھی جاتی ہے، کیونکہ یہ ملک کے مغرب اور جنوب کے اہم سیاحتی علاقوں کو آپس میں جوڑتی ہے۔ اس کی وجہ سے شہروں کے درمیان چلنے والی بسوں پر بہت زیادہ دباؤ رہتا ہے۔

ترکیہ میں گذشتہ ہفتے عید الاضحیٰ کی تعطیلات کے دوران ملک کے مختلف حصوں میں ٹریفک حادثات کے نتیجے میں کم از کم 31 افراد ہلاک ہوئے۔

ترکیہ میں ٹریفک سیفٹی کی رپورٹیں بتاتی ہیں کہ ڈرائیوروں کی تھکاوٹ یا اچانک طبی مسائل، جیسے دل کے دورے یا بے ہوشی، کچھ خطرناک حادثات کی بالواسطہ وجوہات میں شمار ہوتے ہیں، خاص طور پر طویل سفر کے دوران۔