دنیا عظیم لیڈر سے محروم ہوگئی :السیسی

مصر کے صدر عبدالفتاح السیسی نے سعودی عرب کے مرحوم فرمانروا شاہ عبداللہ بن عبدالعزیز کو ان کی شاندار خدمات پر خراجِ عقیدت پیش کرتے ہوئے کہا ہے کہ انسانیت ایک ہمدرد ،دیانت دار اور عظیم آدمی سے محروم ہوگئی ہے۔

انھوں نے ہفتے کی رات ایک نشری تقریر میں کہا کہ ''عربوں اور مسلمانوں کے علاوہ پوری دنیا ایک دانش مند شخصیت کھو بیٹھی ہے،انھوں نے ہمیشہ باوقار مؤقف اختیار کیا''۔مصری صدر نے سعودی عرب کے نئے فرمانروا شاہ سلمان بن عبدالعزیز کے لیے نیک خواہشات کا اظہار کیا ہے کہ ان کی قیادت میں سعودی مملکت مستقبل کی جانب ترقی کا سفر جاری رکھے گی۔

مصری صدر اپنے وزراء اور تاریخی دانش گاہ الازہرکے علماء پر مشتمل وفد کے ہمراہ شاہ عبداللہ کی وفات پر تعزیت کے لیے ہفتے کے روز الریاض گئے تھے۔انھوں نے نئے شاہ سلمان بن عبدالعزیز ،ولی عہد مقرن بن عبدالعزیز اور ولی عہد دوم محمد بن نایف سے ملاقات کی اور ان سے مصر کی حکومت اور عوام کی جانب سے تعزیت کا اظہار کیا۔وہ سعودی دورے کے بعد واپس قاہرہ پہنچ گئے ہیں۔