شام : حماہ میں ترکی کی چیک پوسٹ پر بشار کی فوج کی گولا باری

شام میں ذرائع نے ہفتے کی شب العربیہ اور الحدث نیوز چینلوں کو بتایا کہ بشار حکومت کی فورسز نے حماہ صوبے کے دیہی علاقے مورک میں ترک فوج کی ایک چیک پوسٹ کے اطراف توپوں سے گولا باری کی۔

کارروائی میں کوئی جانی نقصان نہیں ہوا۔ چند روز قبل بشار کی فورسز نے شیر مغار کے علاقے میں ابھی ترکی کی ایک چیک پوسٹ کو نشانہ بنایا تھا۔

دوسری جانب ذرائع نے تصدیق کی ہے کہ ترکی کی ضخیم عسکری کمک شام میں ترک فوج کے ٹھکانوں میں داخل ہوئی ہے۔

ادھر شامی اپوزیشن گروپوں کی شامی حکومتی فورسز کے ساتھ لڑائی جاری ہے۔ بشار کی فورسز کو روسی فوج کی سپورٹ حاصل ہے۔

شامی اپوزیشن گروپوں نے حماہ صوبے کے شمالی اور مغربی دیہی علاقوں میں بشار کی فوج کے خلاف کئی محوروں سے حملے کے دوسرے مرحلے کے آغاز کا اعلان کیا ہے۔ اس سے قبل گھمسان کے معرکوں کے بعد اپوزیشن گروپوں نے بشار کی فوج اور روسی فورسز کے خلاف پیش قدمی کو یقینی بنایا تھا۔

اس کے مقابل شامی حکومت کی فوج نے دعوی کیا ہے کہ اس کی فورس اپنے ٹھکانوں کو برقرار رکھنے میں کامیاب رہی ہے۔

دوسری جانب شام میں انسانی حقوق کے گروپ المرصد نے تصدیق کی ہے کہ حماہ کے دیہی علاقوں میں مختلف محاذوں پر شدید لڑائی کا سلسلہ جاری ہے۔ المرصد کے مطابق شامی حکومت کی فورسز اور روسی فوج نے حماہ کے دیہی علاقوں کو فضائی اور زمینی بم باری کا نشانہ بنایا ہے۔