سعودی عرب: 5 جامعات میں فاصلاتی تعلیم کے پروگراموں میں داخلوں کا دوبارہ آغاز

سعودی عرب کی پانچ جامعات میں برقی تعلیم اور فاصلاتی تعلیم کے پروگراموں میں دوبارہ سے داخلوں کے آغاز کی منظوری دے دی گئی ہے۔

ان میں جامعہ شاہ عبدالعزیز، جامعہ شاہ سعود، جامعہ شاہ فیصل، جامعہ شہزادی نورہ بنت عبدالرحمن اور جامعہ القصیم شامل ہے۔ فیصلے پر عمل درامد یونیورسٹی کے تعلیمی سال 1442 ہجری کے دوسرے سیمسٹر سے ہو گا۔

اس سلسلے میں سعودی وزیر تعلیم ڈاکٹر حمد آل الشیخ کا فیصلہ انسانی صلاحیتوں کی ترقی کے پروگرام سے متعلق ایگزیکٹو کمیٹی کی سفارشات کی منظوری کے بعد جاری ہوا۔

سعودی سرکاری خبر رساں ایجنسی (ایس پی اے) کے مطابق رواں سال برقی اور فاصلاتی تعلیم کے پروگراموں میں صرف درج ذیل ڈپلوما کورسز میں داخلے قبول کیے جائیں گے: سیلز، مارکیٹنگ، بینکنگ، انشورنش اور جنرل ایڈمنسٹریشن.