سعودی عرب اور مصر کے درمیان وزرائے خارجہ کی سطح پر سیاسی مشاورت و رابطہ کمیٹی کا اجلاس آج دار الحکومت ریاض میں منعقد ہو رہا ہے۔
اس اجلاس میں دونوں ممالک کے درمیان دو طرفہ تعلقات، باہمی دل چسپی کے امور، غزہ کی صورت حال اور سوڈان میں پیش آنے والے واقعات زیر بحث آئیں گے۔
اس سے قبل دونوں ممالک نے قاہرہ میں وزرائے خارجہ کی سطح پر مشاورت کی تھی۔ اس مشاورت میں علاقائی حالات پر گفتگو ہوئی اور غزہ میں جنگ بندی اور انسانی امداد کی فراہمی کو اولین ترجیح قرار دیا گیا۔
اس دوران، دونوں ممالک نے موجودہ حالات، بالخصوص فلسطین کے مسئلے پر قریبی تعاون اور ہم آہنگی کی اہمیت پر زور دیا۔ سعودی عرب اور مصر نے اس بات کی بھی توثیق کی کہ وہ علاقائی و عالمی سطح پر امن و استحکام کے لیے باہمی مشاورت اور تعاون جاری رکھیں گے۔
جہاں تک "سیاسی مشاورت و رابطہ کمیٹی" کا تاریخی پس منظر ہے، تو یہ کمیٹی تقریباً 18 برس قبل، یعنی 2007 میں قائم کی گئی تھی۔ اس وقت اس کا افتتاح سعودی وزیر خارجہ شہزادہ سعود الفیصل اور ان کے مصری ہم منصب احمد ابو الغیط نے کیا تھا۔
یہ کمیٹی ہر سال اجلاس منعقد کرتی ہے تاکہ عرب ممالک کے درمیان یکجہتی کو مضبوط بنایا جا سکے اور موجودہ چیلنجوں کا سامنا مؤثر انداز میں کیا جا سکے۔ اس کے ذریعے دونوں ممالک کے درمیان مسلسل مشاورت اور قریبی تعاون کا عزم بھی ظاہر ہوتا ہے، جو علاقائی اور بین الاقوامی معاملات پر مشترکہ موقف کو فروغ دیتا ہے۔
