ترکیہ کے وزیر ٹرانسپورٹ عبد القادر اوگلو نے سعودی عرب اور ترکیہ کے درمیان ریلوے لنک کے منصوبے کی تکمیل کے لیے آئندہ تین سال کی مدت کا تعین کیا ہے۔
ریاض سے العربیہ ڈاٹ نیٹ کے ساتھ خصوصی گفتگو کرتے ہوئے انہوں نے توقع ظاہر کی کہ اس منصوبے کا پھیلاؤ یورپی براعظم تک ہوگا اور واضح کیا کہ ریاض اور انقرہ کے درمیان ریلوے رابطے کی مالی لاگت کی تفصیلات جلد واضح ہو جائیں گی۔
ترکیہ کے وزیر نے انکشاف کیا کہ ریلوے لنک کا منصوبہ سعودی عرب سے شروع ہو کر اردن اور شام سے ہوتا ہوا ترکیہ تک پہنچے گا۔ انہوں نے اس منصوبے میں عراق کی شمولیت کے امکان کی طرف بھی اشارہ کیا۔ وزیر ٹرانسپورٹ نے بتایا کہ سعودی عرب نے اردن کے ساتھ اپنی ریلوے لائنوں کا رابطہ مکمل کر لیا ہے جبکہ ترکیہ نے اپنے ریلوے نیٹ ورک کو شام تک پہنچا دیا ہے۔
انہوں نے مزید کہا کہ اب ہمارے سامنے صرف شامی اور اردنی حصے باقی ہیں اور ہم آج یہی کر رہے ہیں کہ چاروں ممالک کے رابطے کو مکمل کرنے کے لیے تعاون کے فریم ورک کے تحت تفصیلات کا جائزہ لے رہے ہیں تاکہ ممکنہ طور پر پورے براعظم یورپ تک رسائی حاصل کی جا سکے۔
ترک عہدیدار کی یہ گفتگو سعودی وزیر برائے نقل و حمل اور لاجسٹک سروسز انجینئر صالح الجاسر کے ساتھ ریلوے کے شعبے میں دونوں ممالک کے درمیان مشترکہ تعاون کو فروغ دینے کے لیے مفاہمت کی یاداشت پر دستخط کے بعد سامنے آئی ہے۔ اس موقع پر جنرل اتھارٹی فار ٹرانسپورٹ کے سربراہ انجینئر فواز السہلی اور ٹرانسپورٹ و لاجسٹک سسٹم کے متعدد رہنما اور نمائندے بھی موجود تھے۔
یہ مفاہمت کی یاداشت بین الاقوامی شراکت داریوں کو مضبوط بنانے اور ریلوے ٹرانسپورٹ کے شعبے کو ترقی دینے کی سعودی کوششوں کا حصہ ہے تاکہ مسافروں کی نقل و حمل کی خدمات میں مدد مل سکے اور آپریشنل سروسز کے معیار کو بلند کیا جا سکے۔ یہ اقدام نیشنل ٹرانسپورٹ اینڈ لاجسٹک سٹریٹجی کے اہداف اور سعودی ویژن 2030 کے مطابق ہے جس کا مقصد سعودی عرب کو تین براعظموں کو ملانے والے ایک عالمی لاجسٹک مرکز کے طور پر مستحکم کرنا ہے۔
اس تعاون کا مقصد ریلوے کی خصوصیات، ٹیکنالوجی اور اس سے متعلقہ اختراعات کے شعبوں میں ترقی لانا ہے۔ اس کے علاوہ ریلوے منصوبوں کے ڈیزائن، آپریشن اور دیکھ بھال سے متعلق بہترین طریقوں میں تجربات اور علم کا تبادلہ کرنا، انجینئرنگ کے پہلوؤں، انفراسٹرکچر اور سکیورٹی کے معیارات کو بہتر بنانا، ٹرانسپورٹ کے نظام میں انضمام کو فروغ دینا اور ریلوے سیکٹر کے ماحولیاتی اثرات کو کم کرنے کے لیے کام کرنا بھی اس کے مقاصد میں شامل ہے۔
