دنیا کی مشہور، متمول شخصیات امیر ترین بھارتی تاجر کے بیٹے کی شادی میں مہمان

شادی کی تقریبات میں بل گیٹس، مارک زکربرگ، شاہ رخ خان، امیتابھ بچن اور دیگر مشہور افراد کی شرکت متوقع ہے۔

پہلی اشاعت: آخری اپ ڈیٹ:
مطالعہ موڈ چلائیں
100% Font Size
3 منٹس read

بھارت کے امیر ترین شخص مکیش امبانی نے اپنے بیٹے آننت امبانی کی شادی کی تقریبات کا آغاز ایک پر تعیش انداز میں اپنے آبائی شہر جام نگر میں 50,000 سے زائد افراد کے لیے ایک دعوت طعام کے ساتھ کیا۔

مکیش، ان کی اہلیہ نیتا، بیٹے آننت اور ہونے والی بہو رادھیکا مرچنٹ نے بدھ کی شام کو جام نگر میں دیہاتیوں کے لیے اس تین روزہ دعوت کی شروعات کی۔

آننت امبانی اور ان کی منگیتر رادھیکا: رائیترز
آننت امبانی اور ان کی منگیتر رادھیکا: رائیترز

یہ دعوت شادی سے قبل ہونے والی تقریبات کا حصہ ہے اور بھارتی اخبار 'ہندوستان ٹائمز' کے مطابق شادی سے پہلی ہونے والی ان تقریبات میں سے مرکزی تقریبات یکم سے تین مارچ تک منعقد کی جائیں گی، جن میں کئی مشہور شخصیات کی شرکت متوقع ہے۔

مکیش اپنے بیٹے کی شادی کے لیے جام نگر میں ایک بہت بڑا مندر بھی تعمیر کروا رہے ہیں۔ اس حوالے سے ان کی کمپنی ریلائنس نے سوشل میڈیا پر ایک بیان جاری کیا ہے، جس میں کہا گیا ہے کہ یہ مندر کمپلیکس اس لیے بنایا جا رہا ہے تا کہ شادی کی تقریبات میں بھارت کی ثقافت اور روحانی شناخت نمایاں رہے۔

مہمانوں کی فہرست

آننت کی شادی کی تقریبات میں امریکی گلوکارہ ریحانہ، امریکی شعبدہ باز اور فنکار ڈیوڈ بلین اور بھارتی گلوکار دلجیت دوسانجھ پر فارم کریں گے۔

مکیش امبانی اور ان کی اہلیہ نیتا
مکیش امبانی اور ان کی اہلیہ نیتا

ان تقریبات میں دنیا کی کچھ بااثر شخصیات، بشمول بین الاقوامی ٹیکنالوجی کمپنیوں کے چیف ایگزیکٹو آفیسرز، کاروباری شخصیات، بالی وڈ سے تعلق رکھنے والے شہرت یافتہ افراد اور سیاستدانوں کی شرکت متوقع ہے۔

ریلائنس کی جانب سے جاری کردہ مہمانوں کی ایک فہرست کے مطابق مائیکروسافٹ کے بانی بل گیٹس، فیس بک کے بانی مارک زکربرگ، سابق امریکی صدر کی بیٹی ایوانکا ٹرمپ، بالی وڈ کے اداکار امیتابھ بچن اور شاہ رخ خان سمیت بھارتی کرکٹرز سچن تندولکر اور ایم ایس دھونی ان افراد میں شامل ہیں جنہیں ان تقریبات میں مدعو کیا گیا ہے۔

ان تقریبات میں شرکت کے لیے ان مہمانوں کی آج بروز جمعہ جام نگر آمد متوقع ہے۔

فوربز کی ارب پتی افراد کی فہرست کے مطابق مکیش امبانی نہ صرف بھارت بلکہ ایشیا کے بھی امیر ترین شخص ہیں۔اس فہرست میں ارب پتی افراد کا شمار ان کی 'نیٹ ورتھ' یعنی کل اثاثوں کی بنیاد پر کیا گیا ہے، جس میں مکیش امبانی کی نیٹ ورتھ 114 ارب ڈالر سے زیادہ بتائی گئی ہے۔

آننت کی شادی سے قبل 2018ء میں مکیش نے اپنی بیٹی کی شادی بھی شاندار طریقے سے کی تھی اور اس شادی کو اب تک کی بھارت کی مہنگی ترین شادی قرار دیا جاتا ہے۔ اس میں امریکی گلوکارہ بیونسے نے بھی پرفارم کیا تھا اور مبینہ طور پر مکیش نے اس شادی پر 100 ملین ڈالر کا خرچہ کیا تھا۔

مقبول خبریں اہم خبریں

مقبول خبریں