"حملوں کا منصوبہ شام میں بنا، مزید حملوں کی توقع ہے"

فرانسیسی وزیر اعظم مینوئل والس نے خبردار کیا ہے کہ اگلے چند دنوں یا ہفتوں کے اندر فرانس پر پیرس جیسے نئے حملے ہو سکتے ہیں۔ ان کا کہنا تھا کہ "ہم طویل عرصے تک اس خطرے کے سائے میں زندگی گزاریں گے۔"

مینوئل والس نے کہا کہ پیرس حملوں کا 'اہتمام اور منصوبہ بندی شام میں کی گئی۔' انہوں نے یہ بھی انکشاف کیا کہ انہیں ان حملوں کی منصوبہ بندی کا علم تھا۔ "صرف فرانس ہی نہیں پورے یورپ میں ایسے ہی حملوں کی تدابیر سوچی جا رہی ہیں۔"

اتوار کے روز فرانسیسی لڑاکا طیاروں کے شام میں داعش کے مضبوط ٹھکانوں پر شدید حملوں کے بعد انہوں نے 'فرانس کے نئے ردعمل' کا بھی عندیہ ظاہر کیا ہے۔

فرانسیسی وزیر اعظم مینوئل والس نے بتایا ہے کہ جمعہ کے روز پیرس میں ہونے والے خونریزی کے بعد سے ابتک پولیس نے اسلامی حلقوں میں 150 چھاپے مارے ہیں۔

لیون شہر کے وسط مشرقی علاقے سے اسلحہ ضبط کیا گیا ہے۔ ضبط کئے جانے والے اسلحہ میں راکٹ لانچرز، بلٹ پروف جیکٹس، کئی پستول اور کلاشنکوف گنز شامل تھیں۔

فرانس میں نافذ ہنگامی صورتحال کے بموجب پولیس کو دسیوں چھاپے مارنے کا اختیار حاصل ہے۔