یمنی فوج کا صنعا کے نزدیک واقع اہم بیس پر دوبارہ قبضہ

یمنی فوج اور عوامی مزاحمت سے تعلق رکھنے والی فورسز نے دارالحکومت صنعا کے نزدیک واقع تزویراتی اہمیت کے حامل ایک اہم بیس پر دوبارہ قبضہ کر لیا ہے۔

العربیہ نیوز چینل نے صنعا کے نزدیک واقع فرضة نهم کیمپ کی تصاویر حاصل کی ہیں۔ان میں ایران کے حمایت یافتہ حوثی باغیوں اور سابق صدر علی عبداللہ صالح کے وفادار فوجیوں کی اس فوجی تنصیب میں تباہ کاریوں کو واضح طور پر دیکھا جاسکتا ہے۔

قبل ازیں اتحادی فورسز نے صنعا سے شمال میں واقع صوبے عمران کے ضلع حرف سفیان میں حوثی ملیشیا کے کیمپوں کو فضائی حملوں میں نشانہ بنایا تھا۔اتحادی طیاروں نے یمن کے جنوبی صوبہ ضالع میں بھی حوثی باغیوں کے ٹھکانوں پر بمباری کی ہے۔

درایں اثناء یمنی فوج کے نومقرر ڈپٹی سپریم کمانڈر جنرل علی محسن الاحمر نے اقوام متحدہ کی قرارداد نمبر 2216 کے تحت حوثی باغیوں اور سابق صدر علی عبداللہ صالح کے وفادار فوجیوں کے خلاف لڑائی جاری رکھنے کی ضرورت پر زوردیا ہے۔انھوں نے اس عزم کا اظہار کیا ہے کہ ان کے تحت فوج حوثی باغیوں کے زیر قبضہ دوسرے علاقوں کو بھی آزاد کرا لے گی۔