میرے والد کی موت کی وجوہات پُر اسرار ہیں : رفسنجانی کی بیٹی

پہلی اشاعت: آخری اپ ڈیٹ:
مطالعہ موڈ چلائیں
100% Font Size
3 منٹس read

ایران کے سابق صدر اور مجلس تشخیص مصلحت نظام کے سربراہ ہاشمی رفسنجانی کی بیٹی فاطمہ رفسنجانی کا کہنا ہے کہ اُن کے والد کی وفات کی وجوہات ابھی تک پُر اسرار ہیں۔

ایرانی حکومت نے اعلان کیا تھا کہ رفسنجانی کی موت اچانک پڑنے والے دل کے دورے کے سبب ہوئی۔ تاہم ان کی بیٹی فاطمہ نے اتوار کے روز ایرانی نیوز ایجنسی "اِسنا" کے ساتھ انٹرویو میں کہا کہ وزیر صحت اور ان کے والد کا معائنہ کرنے والے کئی ڈاکٹروں کے بیانات درست نہیں تھے اور ان میں تضاد بھی تھا۔

فاطمہ رفسنجانی کے مطابق ڈاکٹروں کے ایک مجموعے نے اُن کے والد کی وفات کے اسباب کے بارے میں جو دلائل پیش کیے وہ غیر اطمینان بخش اور ہمیں موصول ہونے والے حقائق کے خلاف تھے۔

فاطمہ نے اس بات پر زور دیا کہ وفات سے قبل رفسنجانی کی طبی حالت اچھی تھی اور ان کا امریکا میں مقیم ایک ایرانی ڈاکٹر نے معائنہ بھی کیا تھا۔

ایران کے اندر حزب اختلاف کی تحریک گرین موومنٹ کے بعض حامیوں کا کہنا ہے کہ اس بات کا امکان بھی ہے کہ کچھ عرصہ قبل سپریم رہ نما علی خامنہ ای کے ساتھ اختلافات میں شدت آنے کی وجہ سے رفسنجانی کو "حیاتیاتی طور پر" ہلاک کیا گیا ہو۔

گرین موومنٹ کے قریب شمار کیے جانے والے صحافی روحاللہ ذم نے وائس آف امرکا ریڈیو کی فارسی سروس کے ساتھ گفتگو میں دعوی کیا تھا کہ "رفسنجانی کو کوشک کمپلیکس کے سوئمنگ پُول میں پانی کے اندر گلا گھونٹ کر جان سے مارا گیا "۔

ادھر شیعہ مرجع ابو القاسم خزعلی کے بیٹے مہدی خزعلی نے دعوی کیا کہ ڈاکٹروں نے عدلیہ حکام کے دباؤ پر رفسنجانی کی موت کا سرٹفکیٹ جاری کیا جب کہ یہ سرٹفکیٹ فورِنزک رپورٹ کے بعد جاری کیا جانا چاہیے تھا۔ خزعلی کے مطابق رفسنجانی کے خاندان کو شدید سکیورٹی دباؤ کا سامنا ہے اور ان پر میڈیا کو انٹرویو اور اپنے والد کی وفات سے متعلق حقائق کے انکشاف پر پابندی ہے۔

دوسری جانب ایرانی وزیر صحت حسن قاضی زادہ ہاشمی کے اُس بیان نے بھی ایران میں داخلی حلقوں کے اندر تنازع پیدا کر دیا تھا جس میں ہاشمی کا کہنا تھا کہ "رفسنجانی کی طبیعت بگڑنے اور انہیں ہسپتال منتقل کرتے وقت رفسنجانی کے لیے مختص طبی ٹیم اُن کے ساتھ نہیں تھی اور وہ کافی تاخیر کے بعد پہنچی"۔

اصلاح پسندوں کے نزدیک شمار کی جانے والی ویب سائٹ "آفتاب نيوز" نے بھی اس جانب اشارہ کیا کہ دل کا دورہ پڑنے کے بعد ابتدائی لمحات میں رفسنجانی کو طبی امداد کی فراہمی نظر انداز کی گئی۔

مقبول خبریں اہم خبریں

مقبول خبریں