بھارتی پولیس نے ہزاروں لوگوں کے سامنے مسلمان خاتون کا برقعہ اتروا دیا

بھارتی ریاست اترپردیش کے ضلع بلیا میں ریاستی وزیراعلیٰ یوگی آدتیہ ناتھ کی ریلی سے متعلق ایک وڈیو بہت تیزی سے وائرل ہو رہی ہے کیونکہ اس ریلی میں وزیراعلیٰ کو سننے آئی ایک مسلم خاتون سے پولیس زبردستی برقع اتروا رہی ہے۔ اس واقعہ کے بعد بلیا پولیس پر شدید تنقید ہو رہی ہے۔

تفصیلات کے مطابق ریاست اتر پردیش میں انتخابی مہم کے دوران وزیراعلیٰ یوگی آدتیاناتھ کی موجودگی میں پنڈال کی سیکورٹی پر مامور خاتون پولیس افسر نے برقعے میں ملبوس مسلمان خاتون کو سرِ عام بے حجاب ہونے پر مجبور کر دیا۔ پولیس افسر کے حکم پر خاتون نے پہلے حجاب ہٹایا تاہم افسر کو اطمینان نہ ہوا تو سیکورٹی خدشات کا بہانہ بنا کر بھرے مجمے میں پورا برقعہ اتروا دیا۔

مذکورہ خاتون نے میڈیا کو بتایا کہ اس کا نام سائرہ ہے اور وہ بلدیات کے ضمنی الیکشن کے سلسلے میں انتخابی مہم میں بڑھ چڑھ کرحصہ لے رہے ہیں جب کہ وہ اپنے آبائی گاؤں سے برقعہ پہن کریہاں تک آئی اور اس اسلامی پردے پر کسی نے اسے نہیں روکا۔

دوسری جانب واقعہ کی ویڈیو منظر عام پر آنے کے بعد ضلعی انتظامیہ تحقیقات کا حکم دیتے ہوئے ذمہ داران کے خلاف کارروائی کرنے کی ہدایت کردی ہے۔